AZZ-k hondakin organikoak kudeatzen dituzten herritarrei %40ko hobaria ezartzeko eskatu dio Udal Gobernuari

Erabiltzailearen aurpegia

Azpeitiko Udal Gobernuak %25eko hobaria jarri du. Zero zabor bidean konpromisoa hartu duten Udal Gobernu gehienek %40an kokatu dute, etxeko hondakinetan organikoak betetzen duen portzentaia hain zuzen.

Urteurreneko prentsaurrekoan, instituzio publikoen aldetik, konpromisoak hartzen hasteko garaia dela adierazi zuen AZZ-k. Azpeitiko Udal Gobernuari bilera eskaera bat ere helarazi zion, zein asmo dituen argitzeko.

Hemen hobariak %40an jartzeko eskatuz AZZ-k Udal Gobernuari bidalitako eskutitza osorik:

"Azpeitia Zero Zaborrek, Udal Gobernuari,

auzokonposta gure herrian ezartzera doan honetan, Azpeitia Zero Zabor-eko taldekideok ekimenaren inguruko balorazio positiboa egin dugu, batetik zero zabor filosofiarekin bat egiten duelako eta bestetik herritarren artean oso harrera ona izan duelako.

Herritarren eta administrazio desberdinen arteko elkarlan egokiaren eredu dela uste dugu, herritarren konpromisoaren eta erakundeen gaitasuna uztartuz lortua.

Ekimen honetan parte hartuko duten herritarrek, hondakin organikoen kudeaketa beraien kabuz burutuko dute, eta ondorioz, bilketa sisteman legokiokeen kostua ezabatuko dute. Kontuan izan behar dugu hondakin organikoek etxebizitza batean sorturiko hondakin guztien %40-a osatzen dutela.

Bidezko deritzogu beraz, ekimen honetan parte hartuko duten herritarrek jasotzen duten hobaria burutzen duten lanarekiko (edo sortzen ez duten kostuarekiko) proportzionala izatea.

Ondorioz, AZZ-tik Udal Gobernuari dei egin nahi diogu hobari hau %40-koa izan dadin, egungo %25 izan ordez.

Gure eskaria kontutan izango duzuelakoan,

Azpeitia Zero Zabor"

Uztarriak hainbat berrikuntza egin ditu bai webgunean, bai aldizkarian, eta zuen sostengu ekonomikoa behar du aurrera egiteko. Euskaraz, kazetaritza egiten segituko dugu, zuzentasunez eta zehaztasunez, eta zuek bide horretan lagun izatea nahi dugu. Elkarren beharra dugu!


Izan zaitez Uztarriako bazkide