Hilaren 18ra arte luzatu dute Hitzaren Eskolan izena emateko epea

Uztarria.eus 2020ko eka. 9a, 12:00
Iazko Hitzaren Eskolako irudi bat.

Hitzaren Eskolaren bigarren edizioa izango da irailean hasiko dutena. Hitza ardatz duten hainbat sormen adierazpide landuko dituzte saioetan. Andoni Egaña, Maddi Barber, Iñigo Aranbarri, Haizea Barcenilla, Xabier Erkizia eta Arantxa Iturbe izango dira aurtengo irakasleak. Ekainaren 18ra arte eman daiteke izena.

Hitzaren Eskolaren bigarren edizioan izena emateko epea hilaren 18ra arte luzatu dutela jakinarazi du Azpeitiko Dinamoa sormen guneak. Ondo bidean, irailaren 9an ekingo diete saioei eta martxoaren 27an amaituko dituzte.

Hitza ardatz duten hainbat sormen adierazpide landuko dituzte saioetan, eta adierazpide guztiak elkartzen dituen puntuan, hitzean, jarriko dute arreta. Finean, hitzaren ikerketa integral bat eskaintzea da asmoa, ikerketatik nahiz sormenetik, esperimentazioari lekua eginez. Hitzaren ahalaren jakitun egitea nahi dute ikasleak, erreferentziak emanez, lanean jarriz eta praktikaren bidez. Era berean, mundua euskaraz kontatzen jarraitzeko tresnak ematea ere bada helburua.

Sei adierazpide, sei irakasle

Saioetan, sei irakasle-tutore izango dira, bakoitza adierazpide batekoa, eta haietako bakoitza hilabetez izango da ikasleekin. Honako hauek izango dira edizio honetako irakasleak: Andoni Egaña, Maddi Barber, Iñigo Aranbarri, Haizea Barcenilla, Xabier Erkizia eta Arantxa Iturbe.

Dinamoan izango dira saioak: asteazkenetan, 18:00etatik 20:00etara, eta larunbatetan, 10:00etatik 13:00etara. Guztira, 120 orduko ikastaroa izango da, eta presentzialak izango dira saioak. Matrikula orokorra 375 eurokoa da, eta ikasleek, langabeek eta erretiratuek 250 euro ordaindu beharko dute. 

18 urtetik gorako euskaldunek eman dezakete izena Hitzaren Eskolan. 12-15 laguneko taldea osatuko dute, eta interesatuek hemen eman behar dute izena. Informazio gehiago nahi duenak, lotura honetan aurkituko du.