Uztarriaren taldea martxan izango da bihar hasiko den Egunean Behinen laugarren denboraldian

Uztarria.eus | Euskara
2020ko api. 26a, 18:07

Uztarriak bigarrenez jarriko du taldea martxan, eta hainbat sari banatuko du denboraldia aurrera joan ahala. Uztailera bitartean, hamar asteko denboraldia osatu du Codesyntax enpresak, eta parte-hartzaileen bost aste onenak hartuko dituzte kontuan sailkapen orokorra osatzeko. Dagoeneko batu daiteke Uztarriaren taldera.

Bihar, astelehena, hasiko da Egunean Behin mugikorrerako jokoaren laugarren denboraldia, eta Uztarriaren taldea martxan izango da sasoia bukatu bitartean. Uztailera arte, hamar asteko denboraldia prestatu du jokoa garatu duen Codesyntax enpresak, eta ohiko moduan, sailkapen orokorra osatuko dute. Aurreko denboraldiaren logika beretsua erabiliko dute oraingoan ere: hamar astetatik jokalari bakoitzaren bost onenak hartuko dituzte kontuan sailkapen orokorra osatzeko. Sailkapen orokorreko onenek –kopurua ez dute zehaztu– finala jokatuko dute.

Uztarriak bigarrenez jarriko du taldea martxan, eta hainbat sari banatuko du. Sariak aurrerago jakinaraziko ditu komunikazio taldeak, baina denboraldiko jokalari onenaren sariaz gain, beste batzuk ere banatuko ditu parte-hartzaileen artean. Uztarriaren taldean parte hartzeko Egunean Behin aplikazioa deskargatu behar da Google Play edo App Store plataformatik. Aplikazioaren behealdean kokatzen den Taldeak atalean, (+) ikurra zapaldu, giltzaren gainean klik egin eta C6BB98 kodea sartu behar da; erabiltzaileak gisa horretan lortu du UZTARRIA (Azpeitia) izeneko taldera batzea. Jokoa astelehenean hasiko bada ere, taldera batzeko aukera dago jada.

Izenak dioen moduan, egunean behin jokatu daiteke sakelako telefonorako egindako aplikazioan. Hamar galdera erantzun behar dituzte erabiltzaileek ahalik eta denbora laburrenean, eta puntuazioaren arabera, astero sariak banatzen dituzte jokoaren sustatzaileek. Izan ere, astekakoa izaten da sailkapena, astelehenetik igandera bitartean lortutako emaitzen araberakoa. Joan zen denboraldian, hirugarrengoan, 1.072 lagun aritu ziren lehian Uztarriaren taldean, eta talde horretako denboraldiko jokalaririk onena Aretha Franklin izan zen.

Informazio gehiago

Bidali:  

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu