Azpeitiko Udalak azaldu duenez, gaur-gaurkoz Azpeitian baieztatutako koronabirus kasurik ez dagoela jakinarazi du Eusko Jaurlaritzaren Osasun Sailak. Udalak azaldu duenez, baina, horrek ez du esan nahi herria arriskutik kanpo dagoenik, eta horregatik, "orain arte bezala", herritarrei arduraz jokatzeko eskatu die erakundeak.
Administrazioak ere eguneratu ditu Araban, Bizkaian eta Gipuzkoan koronabirusarekin kutsatutakoen eta hildakoen kopuruak: atzotik hiru lurralde horietan ez da inor hil COVID-19 gaitzagatik. Dena den, kutsatutakoen kopuruak gora egin du beste behin. Araban 474 lagun daude koronabirusak jota –atzo baino 30 lagun gehiago–, Bizkaian 201 –atzo baino zazpi gehiago– eta Gipuzkoan 90 –atzo baino bat gehiago–. Nafarroan, berriz, 355 dira kutsatutakoak, atzo baino 81 lagun gehiago.
Eusko Jaurlaritzaren arabera, 362 daude koronabirusaren proban positibo eman eta ospitaleratuta. Euskal Herrian, guztira, 38 pertsona hil dira koronabirusaren ondorioz.