Saharar Herriaren Aldeko Azpeitiko Khamar elkarteak eskerrak eman dizkie errefuxiatuen kanpamenduetara bidaltzeko janari bilketan parte hartu duten herritar guztiei. Urtarrilaren 11n egin zuten elikagaien bilketa herriko BM eta Eroski saltokietan, eta herritarrek emandako erantzuna "ezin hobea" izan dela adierazi dute Khamarreko kideek. "Saharar herriak bizi duen bidegabekeriaren ondorioz, Tindufeko kanpamenduetan bizi diren 150.000 pertsonentzat bizirauteko ezinbestekoa giza laguntza dira bidaltzen dizkiegun elikagaiak", azaldu dute. "Mila esker, beraz, zuen aletxoa jarri duzuen herritar guztiei eta herriko ikastetxeei, janari bilketan laguntzeagatik".
Dena den, Khamarreko kideek azaldu dutenez, aurten, elikagaiak ez ezik, ospitaleetarako oinarrizko materiala, motxilak, arropa, eskolarako mantalak nahiz liburutegietarako materiala ere bidali dituzte errefuxiatuen kanpamenduetara. "Azpeitiko Udalaren dirulaguntzari nahiz Elkar-ekin taldekoek zein liburutegikoek eskainitako laguntzari esker bidali ahal izan dugu materiala", azaldu dute.