Helduen danborradaren zuzeneko emanaldia eta saio berezia eskainiko ditu Uztarriak igandean

Uztarria.eus | Festak
2020ko urt. 16a, 17:01

Urolako Komunikazio Taldeko hiru hedabidek –Uztarriak, Erlo Telebistak eta Urola Kostako Hitzak– zuzeneko emanaldia eta saio berezia eskainiko dituzte San Sebastian bezperan, 22:00etatik 00:45era bitartean. Helduen danborradako zuzeneko irudiak ez ezik, gonbidatuekin saio berezia gidatuko dute Ignacio Arakistainek eta Mireia Galarzak udaletxetik, 23:30 aldean hasita. Uztarria.eus-en, Erlo Telebistan nahiz Urola Kostako Hitzaren webgunean ikusi ahal izango da emanaldia zuzenean.

Ignacio Arakistainek eta Mireia Galarzak gidatuko dute zuzeneko saioa.  Ikusi haundiago | Argazki originala

Hasi da sansebastianetarako atzera kontaketa, eta Urolako Komunikazio Taldeak hainbat berrikuntza eskainiko du jaien aurtengo edizioan. Izan ere, San Sebastian bezperako helduen danborradaren zuzeneko emankizuna egingo dute Uztarriak, Erlo Telebistak eta Urola Kostako Hitzak. 22:00etan hasita, danbor festa zuzenean jarraitzeko aukera izango da hiru hedabide horietan.

Danborrada 22:00etan hasiko da Olazko Andre Mariaren plazatxoaren ingurutik, eta ordu horretan hasita ibilbideko, parrokiako eta plazako irudiak zuzenean ikusi ahal izango dira. Gainera, 23:30etik aurrera, saio berezia eskainiko dute hiru hedabideek udaletxetik. Ignacio Arakistainek eta Mireia Galarzak gidatuko dute emanaldia, eta horiekin hizketan izango da hainbat gonbidatu berezi. Besteak beste, zuzeneko saioan parte hartuko dute San Sebastian eguneko umeen danborradan udalaren omenaldia jasoko duten Rosa Mari Alberdi, Loli Zurutuza eta Maite Gonzalo boluntarioek, Jose Anjel Arruti danborgileak, Nagore Alkorta alkateak eta Mikel Odriozola Festa batzordeburuak nahiz Pedro Illarramendi eta Nagore Illarramendi danbor-jotzaileek.

Saio hori plazako irudiekin tartekatuta eskainiko dute Uztarriak, Erlo Telebistak eta Urola Kostako Hitzak, eta danborrada bukatu bitartean segituko du zuzenekoak. Gainerakoan, San Sebastian jaien inguruko informazio, argazki eta bideo guztiak Uztarria.eus-en eta Urola Kostako Hitzaren webgunean nahiz Erlo Telebistan eskuratu ahal izango dira jaietan eta ondorengo egunetan.

Informazio gehiago

Bidali:  

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu