Loiola Zentroak argazki erakusketa bat zabalduko du bihar, astelehena, 15:30ean, Loiolako Santutegian. Gizakien salerosketari buruzko erakusketa izango da, eta urtarrilaren 3ra arte egongo da zabalik. Epe tarte horretan egunero izango da ikusgai 10:00etatik 13:00etara eta 15:30etik 18:30era bitartean. Basilikatik sartu beharko da Puntu eta aurrera. Bizitzak gehiago egin dezake izeneko erakusketara.
Erakusketak hiru oinarri ditu: salerosketa sufritu duten pertsonak; axolagabetasun eta esplotazio egoeretatik askea den bizitzarekiko itxaropena; eta Elizaren nahiz gizartearen inplikazioa. Salerosketaren biktima izan diren hainbat lagunen bizipenak jaso dituzte 44 argazkiz lagunduta; izan ere, Loiola Zentroko kideek azaldu dutenez, milaka pertsonek segitzen dute gaur egun esklabotasun egoeran. "Pertsonen salerosketak miloika euro mugitzen ditu. Arma-trafikoaren ondoren, munduko bigarren negozio indartsuena da, eta ezin dugu beste aldera begiratu", azaldu dute Loiola Zentroko kideek.