Itziar Sagarzazu (Getxo, Bizkaia, 1937) Loiolako Herri Irratiko esatari izandakoa hil zen larunbatean, 82 urte zituela. Hark 31 urte egin zituen Loiolako Herri Irratian lanean. Hain zuzen ere, 1962an irrati hura sortu eta urtebete baino gutxiagora hasi zen Sagarzazu uhinen artean esatari lanetan. 1994. urtean utzi zuen irratiko lana, eta handik hamasei urtera itxi zuten Loiolako Herri Irratia. Sagarzazuk itxiera "penaz" hartu zuela azaldu zion sasoi hartan Uztarriari: "Albiste tristea da; hainbeste ordu sartu genituen proiektu hura aurrera ateratzen...".
Getxon jaio zen Sagarzazu; izan ere, haren familia Zestoatik ihes eginda zegoen gerra tarteko. Bizitzako lehen urteak Santanderren (Espainia) eta Normandian (Frantzia) eman zituen halabeharrez, eta gerora itzuli zen familiarekin Zestoara. Azken urteetan Zarautzen bizi zen. Sagarzazuren inguruko erreportajea kaleratu zuen Uztarriak 2012ko maiatzeko aldizkarian, eta honako lotura honetan irakur daiteke lan hura.
Gaur, astelehena, izango da haren aldeko hileta-elizkizuna Zarauzko Andra Mariaren Zeruratzea parrokian.