Jon Alberdi pilotariak promozio mailako Lau eta Erdiko Txapelketaren finala jokatuko du bihar, zapatua, Iruñeko Labrit pilotalekuan, Peña II.aren kontra, eta Ilunpe elkarteak joan-etorria egiteko autobusa antolatu du. Gaur arratsaldean ere izango da autobuserako izena emateko aukera Izarraitz pilotalekuan; izan ere, 18:00etatik aurrera infantil eta kimu mailako pilotarien hainbat norgehiagoka izango dira bertan. Gaur-gaurkoz 30 bat lagunek eman dute autobuserako izena.
Iruñera joateko autobusa 15:00etan aterako da bihar anbulatorioaren aurretik, eta Azpeitira partida bukatzean itzuliko da. Jaialdia 17:45ean hasiko da, eta guztira hiru partida izango dira. Bidaia hamar euro ordaindu beharko da.