Hanburgoko NDR Orkestra Filarmonikoak datorren hilean Kursaalen emango duen kontzertura Azpeititik Donostiara joan nahi dutenek doako autobus zerbitzuan egin ahalko dute. Kursaal Eskura egitasmoaren barruan antolatu dute autobusa.
Azaroaren 12an izango da Alemaniako orkestraren emanaldia, 20:00etan hasita, eta Azpeititik 18:45ean irtengo da autobusa, anbulatorio aurretik. Kursaal Eskuraren barruko kontzertuetarako prozedura jarraituz, kursaal.eus webgunean kontzerturako sarrerak erosi beharko dituzte lehenbizi, gero autobus zerbitzua erabili nahi dutenek; 55 euro balio du Hanburgoko orkestraren kontzerturako salgai jarri dituzten sarrera garestienak, eta 11 eurotan eros daiteke merkeena, aipatutako webgunean. Sarrerak erosita, autobusean joan-etorria egiteko asmoa dutenek erreserba egin behar dute, udaleko 943-15 70 68 telefonora deituta edo kultura@azpeitia.eus e-postara idatzita. Langabetuek eta 30 urtetik beherakoek, berriz, autobuserako erreserbarekin batera egin dezakete sarreraren erreserba ere, 3 euroren truke.
Azaroaren 7an bukatuko da autobuserako erreserbak egiteko epea. Gutxienez hamabost pertsonako talde bat ez bada osatzen, eskaintza bertan behera utziko dutela aurreratu du Azpeitiko Udalak.