Lolo Encinasek (Donostia, 1974) ez du ISBko gizonen lehen taldea zuzentzen jarraituko. Donostiarra 2017-2018 denboraldiaren aurretik iritsi zen Juaristi ISB taldera, eta azken bi denboraldietan Zilarrezko LEB Ligako talde hori gidatzen aritu da. Dena den, Encinas berak sare sozialetan azaldu duenez, erronka berri bat dauka eskuen artean. Izan ere, Bilbao Basket taldeko talde teknikoan izango da datorren denboraldian. Alex Mumbru entrenatzailearen laguntzailea izango da ACB Ligan ariko den taldean, eta Encinasekin batera osatuko du taldea Javi Salgadok.
Encinasek esan duenez, erabakiak hartzeko unea iritsi zaio, "erabaki zaila" hartzekoa kasu honetan, "ISB uztea". Entrenatzaileak esker hitzak izan ditu Iraurgi Saskibaloi Taldeko kide guzti-guztientzat, eta bereziki, Jose Luis Zubizarreta Xubirentzat, berarekin sinesteagatik eta gozatzeko aukera emateagatik.