Esklabak-Iturtzulo eremuko babes ofizialeko etxebizitzak esleitu ditu dagoeneko Udalak, eta aste honetan hasi da udal sustapeneko etxeak esleitzen. Udalak azaldu duenez, dagoeneko prest dauka obren exekuzio proiektua, baina udal sustapeneko etxebizitzak esleitzeko zain dago, obraren exekuzioa hasteko eta lanak egiteko lehiaketa publikoa martxan jartzeko. Erakundearen arabera, hiruzpalau hilabeteko epea beharko du etxebizitza horiek denak esleitzeko, eta epe hori pasatuta hasiko dira obrekin. Eraikuntza lanak 20 hilabetean bukatzea aurreikusten du Udalak.
Joan zen urtarrilaren 25ean egin zuten etxebizitza horien zozketa; 408 lagun zeuden zozketetarako izena emanda. Esklabetako eraikinaren atzealdean 129 etxebizitza eraikiko dituzte; horietatik 68 babes ofizialekoak izango dira eta 61 udal sustapenekoak. Lehen fasean, baina, babes ofizialeko 29 etxebizitza egingo dituzte, eta 33 udal sustapeneko. Bigarren faseko etxebizitzen zozketaren prozedura urte bukaera aldera hastea aurreikusten du Udalak.