Imanol Albizu eta Iker Letamendia bertsolariek Gipuzkoako Eskolarteko Txapelketan parte hartuko dute

Uztarria.eus | Kultura
2019ko ots. 12a, 09:10

Ostiralean hasiko da txapelketa Ibarran, eta 23 bertsolarik lau kanporaketa jokatuko dituzte. Bi azpeitiarrek martxoaren 1ean Zestoako Lau Iturri elkartean egingo duten saioan abestuko dute. Kanporaketetarako sarrerak salgai daude dagoeneko, Bertsosarrerak.eus webgunean.

Ostiralean hasiko da Gipuzkoako Eskolarteko XXXIX. Txapelketa, eta aurtengo bat-bateko lehian 23 bertsolarik parte hartuko dute. Guztira, lau kanporaketa egingo dituzte afari formatuko saioetan –Ibarran, Zestoan, Orion eta Oñatin–, eta finala Lasturren izango da apirilaren 5ean. Lau kanporaketetatik bina bertsolari sailkatuko dira finalera.

Urola Kostako 11 bertsolari ariko dira aurtengo edizioan kantuan, eta horietako bi azpeitiarrak dira: Imanol Albizu eta Iker Letamendia. Bi bertsolari gazte horiek martxoaren 1ean, ostiralez, Zestoako Lau Iturri elkartean egingo duten saioan kantatuko dute. Horiekin batera izango dira kanporaketan Oihana Arana, Uxue Alkorta, June Garmendia eta Igauri Lopetegi.

Lau saio horiek afari formatuan egingo dituzte, eta dagoeneko salgai daude afaritarako txartelak www.bertsosarrerak.eus webgunean. Sarrerak saioaren aurreko ostegun eguerdira arte izango dira eskuragarri.

Bidali:  

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu