Binakako Urrezko Aizkolarien txapelketako lehenengo finalerdia jokatu zuten atzo, asteartea, Beasaingo Antzizar kiroldegian, eta han neurtu zituzten indarrak Mikel Larrañaga azpeitiarrak eta Eneko Otaño beizamarrak eta Iñaki Azurmendik eta Ugaitz Mugertzak osatutako bikoteek. Guztira, lau proba jokatu zituzten, eta eskualdeko aizkolariek minutu eta erdiko aldea atera zieten Azurmendiri eta Mugertzari; hori hala izanik, finalerako lehen txartela eskuratu zuten Larrañagak eta Otañok. Martxoaren 3an, Azpeitiko Izarraitz pilotalekuan jokatuko dute finala.
Hilaren 17an, berriz, Binakako Urrezko Aizkolarien txapelketako bigarren finalaurrekoa jokatuko dute Oñatin, eta Xabier Orbegozo Arria V.ak eta Jon Rekondok osatutako bikoteak Iker Vizente eta Ruben Saralegiren aurka neurtuko dituzte indarrak. Egun horretan, gainera, harri-jasotzaileen Bi Harri Txapelketaren bosgarren jardunaldia ere izango da, eta Xabier Aranburu Guzta Urrestillako bizilaguna lehiatuko da han.