Ostiralean, urtarrilaren 23an, egingo dute Plazatarrak egitasmoaren barruko ikasturteko hirugarren saioa. Gazteria Sailak antolatutako jardunaldian kirola izango dute ardatz, eta 17:30etik 19:00etara bitartean kiroldegian egingo dituzte ekintzak Haur Hezkuntzako 5. mailatik Lehen Hezkuntzako 6. mailara arteko ikasleek. Kiroldegian elkartuko dira parte-hartzaileak 17:30ean, eta Xeye atletismo taldeko kideek gidatuko dute saioa.
Izena eman beharko da Plazatarraken parte hartzeko, eta bihar, asteazkena, izango da horretarako azken eguna, gib@azpeitia.eus helbidera mezua idatzita edo 943-15 71 60 telefono zenbakira deituta. Ohiko moduan, lau umeko arduradun batek joan beharko du hitzordura.