Urtero legez, Gabonak igarota eta San Sebastian jaien atarian zabalduko dute Elosiaga auzoko Añota sagardotegiko txotx denboraldia. Aurten ere jai giroan egingo dute ekitaldia, eta Joxe Apalantza kirolariak izango du lehen upela zabaltzeko eta sagardo berriari lehen tragoa emateko ardura; izan ere, errezildar kirolariak ETB1eko Gailurra XTreme 3EM saioa irabazi berri du. (Honako lotura honetan irakur daiteke duela aste batzuk Urola Kostako Hitzak Apalantzari egindako elkarrizketa).
20:00etan hasiko da irekiera ekitaldia, eta Apalantzaz gain, bertan izango dira hainbat bertsolari, hala nola Andoni Egaña, Sebastian Lizaso eta Iñaki Murua. Bertaratzen direnek sagardotegi menuaz gozatu ahal izango dute afalorduan, eta behin sabelak betetakoan, Kupela taldearen erromeria izango da.