Azpeitiko kiroldegiko ateak irekita eta sarrera doan izango dituzte bihar iluntzean saskibaloi zaleek. Izan ere aste erdian, asteazkenarekin, jokatuko du Juaristi ISB taldeak Zilarrezko LEB ligaren bigarren jardunaldiko partida, 20:30ean hasita. Cantabria Estela izango da Lolo Encinasek zuzentzen dituen jokalariek aurrean izango duten taldea.
Joan den asteburuan ekin zion ligari Juaristi ISBk. Zamoran jokatu zuen denboraldiko estreinako neurketa, eta 74 eta 65 galdu zuen. Bihar, beraz, zaleen hauspoak lagunduta, lehen garaipena eskuratzeko helburuarekin aterako dira kantxara Iraurgikoak.