Bertan behera utzi dute autobus zerbitzuetako greba

Uztarria.eus | Ekonomia | Artikulua
2018-07-12 16:51

Hitzarmenaren akordioa lortu dute gaur LAB, UGT eta CCOO sindikatuek eta Avitrans patronalak, eta greba bertan behera utzi dute. Horrenbestez, Gipuzkoako autobusen sektoreak hitzarmen berria du dagoeneko, eta bihar normaltasunez eskainiko dituzte autobus zerbitzu guztiak enpresek.

Gipuzkoako 30 autobus enpresa inguru greba egitekoak ziren datozen lau egunetan –bihar, etzi, hilak 20 eta 21–, baina LAB, UGT eta CCOO sindikatuek bertan behera utzi dute protesta, gaur Avitrans patronalarekin hitzarmenaren gaineko akordioa lortu dutelako. ELA sindikatua ere grebaren deitzaileetakoa zen, baina akordiotik kanpo geratu da.

Horrenbestez, Gipuzkoako autobusen sektoreak hitzarmen berria du dagoeneko, eta bihar ohi bezala eskainiko dituzte autobus zerbitzu guztiak enpresek. Gipuzkoako lan hitzarmena izan dute indarrean enpresek, eta joan zen ekainaren 30ean akordioa sinatzeko bileran ez zuen lan ituneko puntu bat onartu patronalak. Hain zuzen ere, dietak ordaintzea arautzen zuen puntua izan zen bi aldeen desadostasuna sortu zuena, eta horregatik, bertan behera gelditu zen akordioa. Gaur, berriz, aurreakordioan sinatutakoa errespetatzen duen akordioa lortu duela adierazi dute sindikatuek. Beraz, dietak aplikatuko dizkiete langile guztiei.

Bidali:  

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa