Kaleak bete mozorro Karnabal astelehenean

Uztarria.eus | Festak
2016ko ots. 8a, 13:47

Mozorroak nonahi ikusi dira gaur, astelehena, eguerdi partean Azpeitiko kaleetan. Badira urte batzuk umeen karnabaletako desfilea familien mozorro festa bihurtu zela. Urtetik urtera indartzen dihoan joera da, mozorrotutako haurrekin batera beste horrenbeste helduk ere festarekin bat egitearena, eta gaur eguerdikoa horren erakusgarri izan da.

Alde Zaharreko kaleetan ilara luze-luzea osatuz ibili dira batzuk eta besteak, ehundaka lagun; eta kale bazterretan, haiei so, ikusle mordoa. Sevillana, indio, pirata eta printzesa ugari, besteak beste, urteroko legez; eta lehorreko bi itsasontzi ere bai: Veneziako karnabalak Azpeitira ekarri dituen gondola, eta Zumaiako Telmo Deun trainera. Ibilbidearen amaieran, plazara sartu aurretik, desfilean parte hartu duten umeentzako gozoki zorrorik ez da falta izan.

Astelehen arratsaldea eta asteartea

Egun eta erdi gelditzen zaizkie aurtengo Karnabal festei Azpeitian. Hau da datozen orduetarako eta biharko prestatuta dagoen egitaraua:

Gaur, astelehena

  • 16:30: Sokamuturra.
  • 17:00etan: Haurrentzako tailerrak, Olazko Andre Mariaren plazan.
  • 19:30ean: Udal Musika Bandaren eta Urolatarrak txarangaren kalejirak.
  • 23:00etan: Kolpez Blai perkusio taldea, kalez kale.

Bihar, asteartea

  • 06:15ean: Udal Musika Bandaren diana.
  • 07:00etan: Sokamuturra.
  • 12:00etan: Banda Gaztearen kalejira.
  • 16:00etan: Umeentzako jolasak eta parkea Olazko Andre Mariaren plazan.
  • 16:30ean: Sokamuturra.
  • 17:30ean: Monstruos de la Universal taldearen emanaldia.
  • 20:00etan: Karnabalei amaiera emateko, suzko zezena plazan.

Ikusi argazki guztiak haundiago

 

Informazio gehiago

Bidali:  

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu