Azkoitia Azpeitia ISBk badu 'abizena' maila gorenean aritzeko. Maier Lizaso Iraurgiren lehendakariak baieztatu duenez, Añares Rioja etxea izango da Iraurgikoen talde nagusiaren babeslea Emakumeen Ligan. Denboraldi baterako itxi dute akordioa babesle berriarekin.
Babesle berriaren estreinaldi ofiziala bihar bertan, asteazkena, egingo du taldeak. Izan ere, ligako hirugarren jardunaldiko neurketa jokatuko dute bihar Joseba Lizarralde Rubio-renek kiroldegian, 20:30ean hasita. Eta ez dute, ez, nolanahiko aurkaria izango. Salamancako Perfumerias Avenida da Azpeitira datorren taldea, Espainiako Emakumeen Ligako eta Europako indartsuenetakoa, eta liga irabazteko faborito nagusienetakoa, nagusia ez bada.
Denboraldiko aurreneko bi partidak galdu ditu Iraurgik, estreinakoa Spar Gran Canariaren kontra, eta bigarrena joan den igandean Zaragozan, Mann Filter-en kontra (92-62). Oso ondo hasi ziren Rubioren neskak Zaragozan, lehen laurdenean aurretik ibili ziren (7-10, 7. minutuan), baina 9. minutuko 14nako berdinketaren ostean 21-3ko partziala lortu zuten etxekoek, eta horrek min handia egin zien ISBkoei.
Lehen garaipenaren bila jarraitzen dute, beraz, Iraurgiko emakumeek. Biharkoan ez dute lan erraza izango helburua gauzatu ahal izateko, baina horretan ahaleginduko dira.