Trinitateak ospatuko dituzte Nuarben asteburuan

Uztarria.eus | Festak
2015ko mai. 28a, 10:17

Adin guztietako auzotarrentzat egitaraua antolatu dute. Festak larunbatean hasi eta astelehenean bukatuko dira. Sokamuturra, herri afaria, kontzertuak eta umeentzat jolasak egongo dira, besteak beste. 

Iazko Nuarbeko festetako argazkia.  Ikusi haundiago | Argazki originala

Erleen jaia iristear da Nuarbera eta egitarau zabala prestatu dute nuarbetarrek asteburu osorako. Adin guztietako auzotarrentzat ekintzak antolatu dituzte: sokamuturra, herri afaria, kontzertuak, umeentzako puzgarriak... Auzo txikian, festa handiak! lelopean ospatuko dituzte nuarbetarrek triniak

Larunbat arratsaldean, maiatzak 30, emango diete hasiera Trinitateei, 16:00etan botako duten txupinazoarekin. Jarraian, 16:30ean, sokamurruta egongo da eta gauerako herri afaria eta kontzertuak antolatu dituzte. Afaria 20:30ean izango da eta kontzertuak 23:30ean hasiko dira. Lain taldea eta Elizagoien ahizpak arituko dira musikarekin auzoa girotzen. Goizalderako baratzuri-zopa jana antolatu dute festan jarraitzen dutenentzako. 

Igandean, maiatzak 31, meza nagusia izango da 12:00etan eta ondoren hamaiketakoa egingo dute Juan Antxieta musika eskolako trikitilariek lagunduta. Arratsaldean, umeentzat puzgarriak izango dira, 16:30ean. Ondoren, 18:00etan, Nuarbeko bizilagunen eta Azpeitiko sokamutilen arteko erronka izango da. Lokotx biltzen, sokatiran nahiz korrikan arituko dira erronkako parte-hartzaileak, besteak beste. Behin erronka bukatuta, Izer eta Alabierren erromeriak girotuko du auzoa. 

Astelehenean, ekainak 1, festak jarraitu egingo du, eta umeentzako jolasak, tailerrak eta txokolatada prestatu dituzte, 16:30ean hasita. Iluntzean, berriz, erromeria egongo da Laja eta Narbaizaren eskutik.  

Informazio gehiago

Bidali:  

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu