Abian da 2015eko Joxe Takolo beka

Uztarria.eus 2015ko ots. 27a, 11:32

Martxoaren 31a bitartean mendiarekin lotutako proiektuak aurkeztu beharko dira, udaletxeko erregistroan. Bekaren irabazleek 3.000 euroko diru-laguntza jasoko dute proiektua gauzatzeko, eta epai-mahaiak apirilaren bukaeran emango du erabakiaren berri.

Martxan da 2015eko Joxe Takolo beka, eta egitasmoak martxoaren 1etik 31ra bitartean aurkeztu beharko dira, Azpeitiko udaletxeko erregistroan. Joxe Urbieta Takolo azpeitiar mendizalearen omenez, goi-mendizaletasunarekin lotutako proiektuak bultzatzeko sortu zuen Azpeitiko Udalak Joxe Takolo Beka, 2001ean. Proiektuak jatorrizkoak eta maila handikoak izan behar dute, eta aurtengoa bekaren hamahirugarren edizioa da.

Beka jasotzen duenak proiektua gauzatzeko jasoko duen diru-laguntza 3.000 eurokoa izango da, eta Azpeitiko Udalak, Gipuzkoako Foru Aldundiak, Euskal Herriko Mendi Federazioak eta Lagun Onak Mendi Bazkunak finantzatuko dute. Proiektuek goi-mendizaletasunarekin lotura izan behar dute, eta aurten egitekoa izan behar du. Proiektua antolatzen edo parte hartzen dutenek Euskal Herriko mendizaleak, mendi elkarteak edota beste era bateko elkarteak edo taldeak izan behar dute.

Aurkeztutako egitasmoen artean zein lagundu erabakitzeko batzorde teknikoa osatuko dute, erakundeetako ordezkariek eta gaian adituak direnek. Beka ematerakoan kontuan izango dute egin nahi den jardueraren kalitatea, entitateak bere jarduera-eremuan agertu duen ibilbidea, jarraipena eta egonkortasuna, partaide-kopurua eta jardueraren iraupena eta zabalkundea, jardueraren finantziazioa, jarduera antolatzeko azpiegitura eta giza-baliabideak, kirol eta gizarte-mailan jarduera horrek duen interesa, antzeko kirol programa edo eskaintzarik ez egotea eta jarduera hori kualifikatutako pertsonal teknikoak garatzea. Batzordeak apirilaren bukaeran hartuko du erabakia.