Bildu: "Konpromisoa erakutsi nahi dugu azpeitiarrek emandako konfiantzari erantzuteko"

Uztarria.eus | Udala
2011ko mai. 27a, 11:05

Azpeitiko Udalean "apaltasunez" hasiko direla lanean eta euren helburua ez dela gehiengo absolutua inposatzea esan du Etxeberriak

Azpeitiko Bilduk bat egin du larunbat honetan ospatuko den Elkartasun Egunarekin

Bildu koalizioko zerrendakideak, atzo emandako prentsaurrekoan.  Argazki originala

Azpeitiko Bilduk eskerrak eman nahi izan dizkie herritarrei Azpeitian koalizioari emandako konfiantzagatik, lehen indarra izan baitira udal hauteskundeetan, gehiengo osoa lortuta. Eneko Etxeberria alkategaiak adierazi duenez, "igandeko emaitzek ilusioz eta lanerako gogoz bete" dituzte "datozen urteetarako". Hala, Azpeitian aldaketa politiko eta soziala "bideratzeko prest" daudela esan du Etxeberriak, eta koalizioaren apustua "gizarte aurrerakoia, elkartasunean oinarritua eta burujabetzaren aldekoa" dela.

Azpeitiko udaletxean "apaltasunez" hasiko da lanean Bildu, Etxeberriaren arabera, eta gaineratu du euren helburua ez dela "gehiengo absolutua inposatzea". "Alderi politiko guztiok elkarlanean egin behar dugu aurrera garai berri honetan, guztion parte-hartzearekin". Hala, "azpeitiarrek erakutsitako konfiantzari konpromisoarekin erantzungo" diotela adierazi du Bilduk.

Udala garai berrietara "ireki nahi" dutela eta, modu horretan, herritarrei irekia izango den Udala nahi dutela esan du Etxeberriak. Hala, arlo desberdinetan parte hartzera gonbidatu ditu herritarrak, eta Bilduk horretarako tresnak jarriko dituela dio koalizioko alkategaiak. "Guztion artean eraiki behar dugu Azpeitia, inor ez dago sobran".

Euskal Herrian garai politiko berri bat martxan dela iritzi dio Etxeberriak, eta Bilduren aldeko apustua egin duten 315.000 botoak "bakea eta demokrazia ekartzeko hauspoa" direla. "Bizirik gauden herria gara, eta Euskal Herria nazioa den heinean hitza eta erabakia dagozkio, herriaren gehiengoak aldarrikatzen duen moduan, eta gu horretara goaz".

Bilduk "inolako eskubide urraketarik" ez duela onartzen esan du Eneko Etxeberriak. "Ilegalizazioak, atxiloketak eta inkomunikazioak ere badaude, eta presoen aurkako mendeku politika gogortzen ari dira". Beraz, Bilduk "presazkoa" deritzo Euskal Herrian guztien eskubideak errespetatzea, eta hainbat urrats "positibo" egin dira azken hilabeteotan. Hala, ETAren su-eten orokorraren erabakia "oso garrantzitsua" dela adierazi du Etxeberriak.

Azpeitiko Bilduk bat egin du bihar, zapatua, herrian ospatuko den Elkartasun Egunarekin . Horrenbestez, presoen eskubideak "errespetatu egin behar direla"-eta, zapatuko ekimenetan parte hartzera deitu ditu azpeitiarrak.

Bidali:  

Erantzunak

ikusle2011 | 2011-05-30 : 09:05

Konpromisoa ????? Maiatzaren 22an Bilduri eman diot botue eta gaur enterau naiz ez ote duzun asmorik liberatzeko alkate bezala. Izan ere, EHUko irakasle izanda eta dauzkazun negozioekin gehiago irabazten omen duzu (Ez omen zenuen espero irabaztea eta alkate izatea) Eta orain alkate zara. Bota dizun jendeari ez al da iruzurra egitea? Noiz egin behar duzu alkate lana, gauean?

bi | 2011-05-30 : 10:05

ikusle2011-ri
Heuk ere ez dek sinisten Bildui botue eman hioala. Hik EHU-ko beste irakasle bati emango hioan botue eta oain pikauta haonez ia gauzak kakazten hasteko prest 1go prentsaurrekotik...

txikia | 2011-05-30 : 13:05

Ikusle2011, "gaur enterau naiz ez ote duzun...". EgaƱanien, kafie hartzen zeunden bitartien? kontuz zurrumurruekin.. miƱ handiye ein dezakete eta. Eta faorez, jakin gabe ez hitzein.

amek | 2011-05-30 : 14:05

hasteko zorionak lortutako emaitzengatik.
Nik ez nuen garbi ikusten koalizioa,bere garaian esan nuen eta berdinean jarraitzen dut. Dena den bakoitzak egingo du ahal duena. Eta alkatea izatea ez da dedikazio osoa planteatzea, "independienteak" zalantzarik ez izan beraien formak izando dituztela aurrera eramateko erabakiak, orain arte egin den bezala. Zailena, niretzat, beste bi alderdiekin adostea da. Oso homogeneoak ez direlako besterik gabe.
Esan bezala zorte on eta ea lau urte hauetan mantentzeko moduan gauden. Lana aurretik pixkat eginda dagoelako eta sinisgarritasuna ere puntan dagoelako.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu