Etxebeltz-Izarrako BOEtako lanak berriro martxan jarri dituzte eraikuntza enpresek

Urola Kostako Hitza | Hirigintza
2009ko abe. 21a, 09:12

Eremu horretako arazoari irtenbide "egokiena" emateko lanean jarraitzeko konpromisoa hartu dute

Irailaz geroztik geldirik zeuden lanak, lur eremu horietako sustatzaile diren Amenabar eta Altuna y Uria eraikuntza enpresek hala erabakita

Etxebeltz-Izarra eremuan eraikitzen ari diren babes ofizialeko etxebizitzen (BOE) lanak berriro hasi dituzte. Irailaz geroztik geldirik zeuden lanak, lur eremu horietako sustatzaile diren Amenabar eta Altuna y Uria eraikuntza enpresek hartutako erabaki hori hartu baitzuten. Baina, atzo, prentsa ohar bidez Julian Eizmendi alkateak jakinarazi zuen, "eraikuntza enpresek BOEen lanei berriz ekin" dietela. Hilaren 23ra arte jardungo dute etxebizitzak eraikitzeko lanean, orduan langileek Gabonetako oporrak hartuko dituzte.

Etxebeltz-Izarra eremuan babes ofizialeko 208 etxebizitza eraikiko dituzte, eta horiez gain etxebizitza pribatuak ere eraikitzen ari dira. 208 BOEtatik 154 dagoeneko zozkatuta daude; 2008ko apirilaren 4an zozkatu zituzten. Zozkatzeko falta diren gainontzeko 54 BOEen zozketa martxan jartzeko erabakia ere hartuta du Udalak. Hil honen hasieran, Julian Eizmendi alkateak esan zuenez, gainontzeko 54 BOEak datozen hilabeteetan zozkatuko dituzte. Eta, ez horiek bakarrik, baita babestutako etxebizitzak diren Koartelekoak (Julian Elorza hiribidea), Enparan kalekoak eta Nuarbekoak ere.

Alkateak atzo ateratako idatzian azaldu zuenez, Etxebeltz-Izarrako lanak azken asteetan geldirik egon badira ere, eremu horretako eraikuntza enpresak eta Udaleko Hirigintza Batzordea "hitz egiten ari dira auziari aterabide bat eman nahian. Denen aldetik jarrera ona dagoela ikusita, eraikuntza enpresek etxebizitzak eraikitzeko lanak berriro hasi dituzte".

Adostasunerako konpromisoa

Horrez gain, arazoari "irtenbide egokiena" emateko lanean jarraitzeko asmoa ere azaldu dute: "Datorren urtarrilaren erdialderako adostasunera iristeko ahalegina egiteko konpromisoa hartu dute".

Leku Eder SA etxegintzako enpresak Azpeitiko Arau Ordezkatzaileen kontra hainbat errekurtso du jarrita, eta aldeko ebazpenak lortu ditu. Iazko abenduaren 19an EAEko Auzitegi Nagusiak emandako ebazpenaren arabera, Etxebeltz-Izarra, Alde Zaharra, Soreasu eta Julian Elorzari dagokien arau ordezkatzaileen aldaketa baliogabetuta gelditu zen.

Baina, joan den uztailean Udalak herriko hirigintza arautzen duen Plan Orokor berria egitea onartu zuen, babes ofizialeko etxebizitzen auziari irtenbidea emateko. Irailean, ordea, Etxebeltz-Izarra eremuko sustatzaileek Udalarekin eremu horri buruz eginda zuten hitzarmena bertan behera utzi eta BOEn lanak gelditu egingo zituztela adierazi zuten. Orduz geroztik orain arte, Etxebeltz Izarrako babes ofizialeko etxeen lanak etenda egon dira.

Bidali:  

Erantzunak

Nickuste | 2009-12-21 : 12:12

Berriro lanean hasi direla (???), batenbatek ikusi al du mugimendurik etxe-hezur hoietan?
Hainbeste denbora geldirik egon, berriro hasiko direla eta abenduak 23an oporrak dituztela? Hau da, berriro gelditzen direla, ez?
Obrak berriro abiatzea lorpena al da? Ala egoera txar txar batean argi-izpitxo bat besterik ez? Gero jarraituko al dituzte lanak gogoz?
Horrez gain, zer negoziatuko da? Zer galdu behar du Azpeitiak Etxebeltzeko egoeragatik?
Benetan, negargurea ematen du Etxebeltz-Izarrako egoerak...

irish | 2009-12-21 : 13:12

Nik, obrak martxan daudela ikusten dudanean sinistuko dut, momentuz niretzako geldirik daude.
Ez da garairik onena zer nolako martxarekin hasiko diren ikusteko, oporrak eta tartean direla. Baina behin oporrak pasa eta gero hasi behar badute, ganoraz hasi daitezela behintzat, ikus dadila euren "borondate ona". Ez behintzat udara aurretik obratan zegoen erritmo lasai hortan, faborez, hiru tipo han bueltaka ikusita obrak martxan daudela ezin esan...
Ta Udalari, hasieratik eskatu dugun bezala, argitasuna eskatzen diot, informazioa eman dezatela eta jugada arrarorik ez mesedez. Hainbeste denbora eta gero, hainbeste nahaste borraste ta gero Etxebeltz Izarra ez dadila konstruktoreen interesak zaintzeko aitzakia bat berriro ere izan.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu