Azpeitiko ahozko ondarea jasoko du Badihardugu Euskara Elkarteak

Uztarria.eus 2009ko ira. 3a, 14:09
Gaur (osteguna) sinatu dute hitzamena Ana Mendizabal Azpeitiko Udaleko Euskara zinegotziak eta Asier Sarasua Badihardugu Euskara Elkarteko lehendakariak.

Azpeitiko Ahotsak ekimena jarri dute martxan

Adineko azpeitiarrak elkarrizketatuko dituzte

Azpeitiko ahozko ondarea eta herri hizkera jaso, landu eta zabaltzeko asmoz Azpeitiko Ahotsak izeneko ekimena abian jarri dute Azpeitiko Udalak eta Badihardugu Euskara Elkarteak. Gaur (osteguna) aurkeztu dute ekimena Ana Mendizabal Azpeitiko Udaleko Euskara zinegotziak, Asier Sarasua Badihardugu Euskara Elkarteko lehendakariak eta Aitziber Otegi ekimenaren teknikariak.

"Ekimen interesgarria bezain garrantzitsua da, herriko kultura, historia, etnografia edota hizkuntzaren bilketa aurrera eramango baita adineko 60 azpeitiarrei egindako elkarrizketetan jasotako informazioarekin", azaldu du Ana Mendizabal Azpeitiko Udaleko Euskara zinegotziak. Era horretan, Azpeitiko XX. mendeko bizimodu tradizionala jaso eta gordeko dituen datu-base digitala sortzearekin batera, Azpeitiko euskalkia aztertu eta hiriko ahozko artxiboa antolatuta geratuko da.

Elkarrizketen bidez

Badiharduguk herriko jende nagusia elkarrizketatuko du eta bideoz grabatuko ditu elkarrizketak. Orain arte herrian egin diren beste grabaketa lanekin batera, dena datu base batean sartu eta antolatuko dute. "Azpeitian jaio eta bizimodua Azpeitian egin dutenak elkarrizketatuko dira. Elkarrizketatuak gizarte arlo ezberdinetakoak izango dira, 70 urtetik gorakoak", azaldu du Sarasuak. Informazio guztia herritarren esku jarriko dute www.ahotsak.com/azpeitia eta www.azpeitia.net webguneetan.

Ekimenaren teknikaria den Aitziber Otegik gaineratu duenez, "Azpeitiko 15 auzotan egingo ditugu elkarrizketak. Dagoeneko 9 pertsonekin egon gara eta orain arteko emaitzekin gustura gaude". Uztailaren bukaeran hasi ziren eta hiru urte emango dituzte proiektu osoa egiten.