Garikoitz Etxeberria, aske eta herrian

Uztarria.eus 2009ko ots. 2a, 21:02
Garikoitz Etxeberria 'Kafe' —argazkian, eskubian—, gaur 19:45ean, Orkatzen, Joseba Segurola presoaren arreba Marijorekin.

Kafe Haikako kide ohiak 9:30ean irten du Bonxeko kartzelatik, sei urteko zigorra osorik bete ondoren

Azkeneko albistea (20:03). Harrera jendetsua egin diote. Harrerako bideoa ikusi hemen

Sei urtean eduki dute Garikoitz Etxeberria Kafe Haika gazte erakundeko kide ohia preso Espainiako, Galiziako eta Euskal Herriko kartzeletan, eta gaur (astelehena) goizean geratu da libre, zigorra osorik beteta. Bonxen (Galizia) egon da preso 2007tik, Azpeititik 665 kilometrora, eta 9:30ean irten du handik.

Haren gurasoek uztarria.com-i orduan esan diotenez, "harrera hunkigarria" egin diote han, baina kartzela kanpoan guardia zibilek harrera filmatzea eragotzi diete. Etxeberriaren gurasoez gain, hamalau lagun ere joan dira Bonxera, eta guztiak ere segituan abiatu dira Azpeitira bidean.

Herrira 16:00ak aldera heldu da, bazkaltzera joan da senideekin-eta, eta gaur bertan egingo diote lehen ongi-etorria preso ohiari, 19:30ean, Orkatz Kultur Elkartean. Harrera nagusia larunbatean izango da: 19:00etan Frontoi Txikin ekitaldia eta 21:00etan txotx Azoka Plazan. Honako txartelak aurretik eskuratu behar dira, Jim Clark, Txarrantxa eta Orkatz tabernetan.

2001ean atxilotu zuten lehen aldiz

Haika-Segi auzia dela-eta atxilotu zuen 2001eko martxoaren 6an Espainiako Poliziak etxean, beste hogeitaka gazterekin batera, eta bi alditan egin ditu sei urteok preso.

2005eko martxoaren 4an irten zuen libre lehen aldiz, Alcala-Mecotik (Madril, Espainia; Azpeititik 500 kilometrora dago). Egun haietan ari ziren egiten Haika-Segi epaiketa, Madrilen -27 lagun zeuden auzipetuta-. Epairik ezean eta luzapenik ezean, legez ezin dira lau urte baino gehiago egin kartzelan, eta Kafek beteak zituen orduan.

Epaiketan Espainiako Auzitegi Nazionalak erabaki zuen Jarrai, Haika eta Segi ez zirela "erakunde terroristak". Hiru urte eta erditik beherako zigorrak jarri zizkieten, eta Kafe-eta ez ziren kartzelara itzuli.

2007ko urtarrilaren 19an, ordea, Auzitegi Gorenak hankaz gora utzi zuen Auzitegi Nazionalaren epai hura, Jarrai, Haika eta Segi "talde terrorista" zirela esanda. 23 kideri seina urteko kartzela zigorra ezarri eta atxilotzeko agindua eman zuen. 23 kide haien artean zegoen Garikoitz Etxeberria.

ETAren su-eten garaian etorri zen Gorenaren epaia, eta ordurako esaten zen erabakiak beste auzi batzuetan eragina izan zezakeela (18/98n, HB-EH-Batasunan, Aministiaren Aldeko Batzordeak-Askatasunan, Udalbiltzan...), jurisprudentzia ezarri zuelako. 18/98n eta Aministiaren Aldeko Batzordeak-Askatasunan eduki zuen; beste epaiketak ez dituzte oraindik egin.

Gorenaren epaiaren ostean, 2007ko otsailaren 4an atxilotu zuen Ertzaintzak Kafe, Bilbon, auziko gazteek Esperantza frontoian egindako ekimenean. Hasieran Martutene Donostiako espetxean sartu zuten, handik gutxira Galiziara bidaltzeko.

Auziko beste lagun batzuek ere irten dute kartzelatik aurreko egunetan. Gaur bertan Garazi Biterik, Olatz Dañobeitiak eta Ugaitz Elizaranek ere bai. Beste batzuek, hala ere, ez dute zigorra beteta osorik, geroago sartu zituztelako preso.

Azpeitiko AAMren salaketa

Azpeitiko Amnistiaren Aldeko Mugimenduarentzat (AAM), "berri pozgarria" da Garikoitz Etxeberria herrira itzultzea. "Sei urte kartzelan igaro ditu Espainiako Estatuaren eskutik, lan politiko bat egiteagatik bahituta".

"Kaferekin egin duen bezalaxe, Garzonek guztia da ETA tesiaren barruan" hainbat alderdi politiko, erakunde eta mugimendu ilegalizatu duela eta bertako hainbat kide kartzelaratu duela salatu du Azpeitiko erakundeak. "Hor ikusten da Estatuak politikoki ezin dituela Espainiako Konstituzioa kolokan jartzen dituzten erakundeak garaitu, eta tesiak asmatuz eta legearen bidez ilegalizatu egiten ditu", gaineratu du. "Kriminalizatzea eta horrelako erakundeak mapatik ezabatzea da helburua".

Preso azpeitiarrak ere gogoan izan ditu Azpeitiko AAMk. "Sei herritar daude preso eta Euskal Herri mailan beste 750etik gora geratzen dira. Kafe etxera etortzea pozgarria da baina beste denak herrira ekarri arte lanean jarraitu beharra dago", dio. Errepresioari eta salbuespen egoerari aurre egiteko deia egin du.

Azkeneko albistea (20:03). Harrera jendetsua egin diote. 19:40an sartu da Erdi kalean Garikoitz Etxeberria, behealdetik, eta Orkatz aurrean berrehunen bat lagun zituen zain, pasilloa eginez, ikurrinekin eta euskal presoen aldeko banderekin. Txistulariak ere bai, giroa animatuz.

Dantzari batek aurreskua egin dio Orkatz aurrean, eta elkarte barruan Jokin Urangak, Haritz Etxeberria Ministro-k (presoen-eta egoeragatik "amorruz" kantatu duela dio, "nahiz eta poza sentitu" gaur) eta Nekane Zinkunegik bertso bana kantatu diote. Azken horrek preso oihari eskatu dio tabernako bere argazkia kentzeko.

Garikoitz Etxeberriak hartu du hitza ondoren, eta labur mintzatu da. Preso eduki duten azken garaian ere bere senideei eta berari azaldutako elkartasunagatik eskerrak eman ditu, eta presoen egoera ekarri du gogora, "gogortzen ari baita, eta ez da topikoa. Hor dago Parot dotrina —zigorrak luzatzea— eta gaixotasun sendaezinak dituzten presoen egoera. Izugarrizko injustizia betetzen da politika kriminal horrekin", esan du. Presoen eskubideen alde lan egitera animatu ditu herritarrak.

Azpeitiko ezker abertzalearen lana nabarmendu du, "azkeneko asteetan erakutsitako tinkotasunagatik eta emandako mailagatik".

Harrerako bideoa ikusteko klikatu hemen

Elkarrizketak

Uztarria herri aldizkariak Etxeberriarekin egindako bi elkarrizketak hemen: I eta II. Urola Kostako Hitza-k egindakoa hemen.

Azpeitiko presoak, deportatuak eta iheslaria

Presoak
- Juan Karlos Arruti. (Paterra) Puerto Santa Maria I (Espainia) kartzelan daukate preso, Azpeititik 1.070 kilometrora. 1989ko irailean atxilotu zuten.
- Gotzon Aranburu. Villenan (Herrialde Katalanak) preso, 760 kilometrora. 2002ko abenduan atxilotu zuten.
- Xabier Etxeberria. (Txapi) Mureten (Frantzia) preso, 350 kilometrora. 2003ko urtarrilean atxilotu zuten.
- Jabi Agirre. 2003ko urtarrilean atxilotu zuten Frantzian, eta 2008ko abenduaren hasieran Espainiaratu egin zuten. Soto del Realean (Espainia) dago preso, 420 kilometrora.
- Joseba Segurola. Osnyn (Frantzia) preso, 880 kilometrora. 2005eko martxoan atxilotu zuten.
- Iker Iparragirre. Bois D'Arcyn (Frantzia) preso, 910 kilometrora. 2007ko uztailean atxilotu zuten.

Deportatuak
- Inaki Etxarte. Kuban deportatuta.
- Maria Angeles Artola. Venezuelan deportatuta.

Iheslaria
- Juan Manuel Bereziartua. (Pakea)

Askatasunaren weba: www.askatu.org