EAE-ANV: "Hauteskunde demokratikoak egitea dugu helburu"

Uztarria.eus | Politika
2007ko mai. 16a, 14:05

Azpeitian, "ezkertiar eta abertzale" ikuspegitik, "aldaketa" egiteko proiektua aurkeztuko dute

EAJ eta EAko hautagaiei gonbita luzatu diete "adostutako" mahainguru batean parte hartzeko

EAE-ANV alderdia atzo Sindikatu Zaharrean egindako agerraldian.  Argazki originala

Azpeitiko EAE-ANV alderdiak atzo (asteartea) egindako agerraldian azpimarratu zuen herri honetako ezkertiar eta abertzaleek "bere aukera politikoa egiteko ezintasunari erantzun nahi" diotela maiatzaren 27 egingo diren udal hauteskundeetan. "Hauteskunde demokratikoak" egitea dutela helburu adierazi zuten. "Ez dugu utziko Azpeitian errotutako mugimendu hau aukerarik gabe geratzea, eta horri erantzuteko asmoz aurkeztuko gara hauteskundeetara", azaldu zuten agerraldira bildutakoek.

Horren aurrean, gainontzeko alderdien "jarrera zapaltzailea" salatu zuten. "PSOEk, EAJren laguntzarekin, ehunka zerrenda baztertu ditu; horien artean, Azpeitiko Abertzale Sozialistena eta Gipuzkoako EAE-ANVrena. Iruzur berri bat egin nahi digute". "Imazek PPrekin gobernu akordioetara iristeko prestutasuna agertu du eta ezker abertzalekook, berriz, parasito eta garrapata bezalako deitura samurrekin izendatu gintuen".

Ildo beretik, joan den lau urtekoa "bazterketaren legegintzaldia" izan dela salatu zuten. "Herriaren laurdena baztertuta funtzionatu da udaletxean, eta erabaki garrantzitsuak hartu dira, gainera. Arau ordezkatzaileak onartu dituzte, esaterako, eta zilegitasun demokratikorik gabe" diote.

Hala ere, joan diren lau urte horietan "proiektu ezkertiar eta abertzaleak pauso sendoak eman ditu eta proposamen berritzaileen aitzindariak izan dira", haien ustez. Ildo beretik eta datorrenari begira, "Azpeitia berri bat, udal berri bat" eraikitzeko apustua luzatu zuten, "herri honek aldaketa behar duelako". Izan ere, "herritarrona den Udala alderdi baten eskuetan dago eta erabakitze eta parte-hartzea ere mekanismo beretatik joan dira".

Mahai-ingururako gonbita gainontzeko alderdiei

EAE-ANV alderdia proposamen berri batekin azaldu zen: dei egin zioten bereziki EAJ eta EA alderdietako hautagaiei mahai-inguru batean parte hartzera. Horretarako, Kaito Telebista erabiltzea proposatu du. Dena dela, prest agertu ziren moderatzaileaz eta eztabaidatuko diren gaiez "adostasunera" iristeko. "Herritarrentzako aberasgarri" iritzi dio EAE-ANV alderdiak ekimen hori eta beste alderdien erantzunaren zain gelditu dira.

Bidali:  

Erantzunak

jaionearregi | 2007-05-16 : 15:05

ANVk PNV eta EA alderdiekin mahainguru publiko bat egitearen proposamena oso interesgarria iruditzen zait. Beste bi alderdiek erantzun al dute?

Odriozola | 2007-05-17 : 14:05

Politika gurutzatua eskatzen zuen Pako Aristik bere idatzian, gurutzada politiko honen aurrean, urgentziaz. Bai hil hala bizikoa deritzot politika gurutzatua egiten hastea ezker abertzaletik, iraun edo desagertze kontua. Aukera bada, herri honetan behintzat, eta baliteke azkena izatea. Gurutzatzeko dugun gaitasun apala, nahasteko, elkartzeko dugun ahulezia nabaria da, lotsatiak, itxiak. Puritanismoa praktikatzen dugu, programa idatzia. Hauteskundetan parte hartzen utzi nahi izan ez diguna, PNV, orain oposizioan uzteko gai ez bagara gureak egin du. Hauteskunde demokratikoak izatea bada gure lehen helburua, boteretik kentzea litzateke lehen helburu ere, hori gauzatu izan nahi ez duena. Kosta hala kosta, programen gainetik, itxitasunen gainetik, gero gerokoak. Hauteskundetatik kanpo utzi nahi izan gaituena, agintetik kentzeko gai ez bagara gureak egin du. Horrek izan behar luke abiapuntua, prezio garestia ordaindu behar badugu ere. Lanean hasteko eskatuko nuke, politika gurutzatuan gaurtik, zain dagoenik bada eta, emaitzei begira egon gabe. Gora zuek.

jaionearregi | 2007-05-18 : 10:05

Aipatu dituzun hainbat gauzekin ados, baina zer esan nahi duzu politika gurutzatuarekin?Eta bestalde, ez al da oso dramatikoa esaten duzuna?

Odriozola | 2007-05-18 : 11:05

Politika gurutzatuaz, elkartzea, bat egitea, puntu komunetan sakontzea, indarrak biltzea esan nahi dut. Une eta leku honetan EAEk, EAk, Aralarrek eta IUk ezinbestekoa dutelakoan nago bat egitea, iraun nahi badute. Ezkerrak bat egin behar du gurutzada politikoan ito nahi ez badu. Gurutzada politikoa bizi dugu, eliminazio politika, faxismo argi eta garbia. Aurrera daramatenak ez ditu itoko, gainontzekoak baizik. Dramatikoa? Egoera makilatzen saiatzen dira ,beste itxura ematen, baina errealitatea hori da. Noski gizartea faxismora ohitzen ari da pixkanaka.

pakita | 2007-05-18 : 14:05

Denborak jarriko du bakoitza bere lekuan, gora gu ta gutarrak!

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu