"ELA, LAB, ESK, STEE-EILAS, EHNE, HIRU eta ELB sindikatuek gaur goizean Madrilen herritarren aurka egindako sarraskia erabat arbuiatzen dute. Justifikaziorik ez duen atentatu odoltsua ikusirik, sindikatuok hildakoen senide eta adiskideei beren dolumina helarazi nahi diete, zaurituta daudenei lehenbailehen osatzeko nahia eta Madrilgo herriarekiko zinezko elkartasuna adierazi, batik bat langile-klaseari.
Atentatu honekiko arbuioa eta biktimekiko elkartasuna agertzeko, ELA, LAB, ESK, STEE-EILAS, EHNE, HIRU eta ELBk Euskal Herriko langileei dei egiten diete bihar, eguerdiko hamabietan lantokien aurrean ordu laurdeneko lanuzte eta bilkurak egin ditzaten".