Mikel Azkune azpeitiarra atxilotu du Guardia Zibilak

Uztarria.eus | Besterik
2003ko urr. 16a, 09:10

Goizaldean Martin Ugalde Kultur Parkearen kontrako operazioa izan da Guardia Zibilaren eskutik eta Juan del Olmo Espainiako Entzutegi Nazionaleko epaileak aginduta. Operazio horren barruan zortzi atxilotu izan dira, tartean Mikel Azkune azpeitiarra.

Martin Ugalde Kultur Parkearen kontrako operazioan zortzi atxilotu izan dira  Argazki originala

Martin Ugalde Kultur Parkea —Berria egunkaria ere han dago, baita Kontseilua eta Plazagunea ere— itxita eduki du Guardia Zibilak goizeko 08:50 inguru arte; orduan langileek barrura sartzeko aukera izan dute.

Egunkaria-ren itxierarekin lotura omen du gaurko operazioak. Martin Ugalde Kultur Parkea miatzen ari ziren bitartean Zabaltzen (Euskalgintza Elkarlanean eta Elkar argitaldariaren kidekoa) banaketa enpresaren egoitza (Donostiako Ibaeta auzoan) ere miatzen ari zen Guardia Zibila.

Zortzi atxiloketa izan dira goizaldean, tartean Mikel Azkune azpeitiarra. Mikel Azkune Egunkaria-ko langilea zen itxi zutenean. Beste atxilotuak, berriz, Jose Mari Sors (Euskalgintza Elkarlanean fundazioko presidentea), Joanmari Larrarte, Mikel Arrizabalaga, Amando Hernandez, Mikel Sorozabal, Xabi Legarra eta beste bat izan dira.

Juan del Olmo epailea izan zen Euskaldunon Egunkaria itxi zuena ere. Orduan atxilotutako hiru lagun, Iñaki Uria, Xabier Oleaga eta Xabier Alegria espetxean daude oraindik.

Berriako webgunean honen berri. Honen berri Sustatun ere eman dute

Bidali:  

Erantzunak

Uztarria.com | 2003-10-16 : 09:10

EFE agentziaren arabera Angel Ramon Diez omen da zortzigarren atxilotua. Hau Lizarran atxilotu omen dute.

uztarria.com | 2003-10-16 : 12:10

Mikel Azkune loiolatarra da, baina Errenterian bizi da. *Berria*-ko langile azpeitiar batek kontatu digunez, Errenterian Mikel Azkuneren etxera sartu denean Guardia Zibila Mikel eta honen emaztea "hasieran oso urduri" jarri omen dira. Etxeko atea oso gogor jo omen du poliziak eta atea Mikelen emazteak ireki omen du. "Gero, pixkanaka lasaitu omen dira. Bi ume dituzte
(batek urtebete baino gutxiago ditu). Umeak esnatu egin omen dira eta negarrez hasi. Gero egongelara joan omen dira, baina ondoren haurrak logelara eramaten utzi die. Guardia Zibilak mihaketa bukatu duenean emaztea agurtzen utzi omen dio Azkuneri".

Herri batzarra | 2003-10-16 : 12:10

Gaur, urriak 16, 19:30ean herri batzarra izango da plazan.

uztarria.com | 2003-10-16 : 15:10

Idoia Astarloza, Mikel Azkuneren emazteak, "Berria.info-n":http://www.berria.info/edizioa_ikusi.php?id=1636
atxiloketen nondik norakoa azaltzen du.

Aupa Mikel | 2003-10-16 : 16:10

Aupa Mikel:
Hau hiretzako duk, ea heure etxetik azkar irakurtzen dekan mezu hau eta horrelako asko idazteko denborarik ez digun ematen.
Hirekin batera gure zati handi bat eraman dute.
Laster herrian trago bat hartzen ikusi nahi haugu.

Aupa mikel!!!! | 2003-10-16 : 18:10

Eutsi goyei la ostia! UTZI BAKEAN EUSKAL HERRIA!!!

Mikel askatu! | 2003-10-16 : 19:10

Mikel eta beste denak askatu! Eta lehengokoak ere bai!

Eneko | 2003-10-16 : 20:10

Oraintxe entzun dut Mikel Irizar izeneko bat Euskadi Irratian larunbateko manifestazioko leloa kritikatzen. 'Gora Euskal Herri euskalduna!" da leloa, eta gogorregia eta ezegokia iruditzen zaio hari. Noiz hasiko mamiari benetan heldu beharrean lelo bat kritikatzen eta euskalgintzak (euskalgintza publiko, ezagun eta irekiak; esan beharra ere...) berriz ere egundoko egurra jaso duenean, oraindik Egunkaria itxita dagoenean eta Egunkariako hiru lagunek zortzi hilabete daramatzatenean preso ezer egin gabe. Uneak eta uneak daude, eta hau tinko azaltzeko unea da. Eta burua, hotz; eta horrelako lelo bat jartzeak ez du esan nahi burua galtzen denik eta bihotzarekin jokatzen denik. Hori pentsatzea, errespeturik ez izatea da, mespretxatzea antolatzaileak. Euskalgintza horrekiko gorrotoa-edo duela antzematen zaio Irizarri. Eta elkarren artean ez badira ondo konpontzen, beti dago aukera kritika egiteko, bat goxo-goxo bizi denean eta besteak kartzelara joateko mehatxupean bizi direnean, baina une hauetan!... Eta, gainera, une hauetan antolatzaileen lelo bati heltzea ere!... Kritika hor zentratzea ere!.... Zer pentsatzen dugu ba, lelo 'bigunagoa' jarrita euskararen aldeko borrokak (bai, borrokak) asko irabaziko duela?; barkatu, zeozer irabaziko duela? Barkatu, baina lelo 'bigunagoarekin' manifara joango litzatekeen jende horrek hurrengo egunean dauka ahaztua gai hau (eta horietako asko abertzaleak lirateke), eta horretaz ez ohartzea inuxentea izatea da. Eta esan ohi da inuxenteek jasotzen dituztela kolpeak gaur egungo bizimodu honetan. Gezurra. Hemen tinko dabiltzanek jasotzen dute egurra. Eta tinko jarduteak ez du derrigorrean esan nahi jokabide biolentoa izatea; edo euskalgintzakoen eta kulturgintzakoen jokabidea zalantzan jartzen hasi behar ote du baten batek?
Lagunok, zapatuan, Donostiara. Gora Euskal Herri euskalduna; eta askatua!

atxilotuak askatu! | 2003-10-16 : 20:10

Ni ere ez nago larunbateko manifestazioaren leloarekin oso ados. Egunkariari ez diote euskaraz idazten duelako egurra sartzen, berriak objetiboki ematen dituelako baizik. Eta hau arrisku bat da gobernuan dagoen PP ko gobernuarentzat.Hau denok dakigula pentsatu nahi dut, batzuetan ez badu ematen ere. Ez dut ulertzen bai euskarari gora euskal herri euskalduna lelo hori jartzea. Norbaitek emango aldizkit arrazoiak??? eskertuko nuke.

atxilotuak askatu! | 2003-10-16 : 20:10

Eta ez esan ezer egin gabe kritikak egitea dela errazena, euskal herriaren aldeko borrokan egiten diren ekintza ugaritan ikusiko garelako, bihar eta larunbatean Donostian barne.

utzi lelokeriak | 2003-10-17 : 12:10

Mesedez, utzi lelokeriak, utzi leloaz hitz egiteari, eta heldu mamiari, goazen bihar Donostiara, egin egunero lana euskararen alde (txapa merkerik gabe).
Gora Euskal Herri euskalduna!

Aitzakiarik ez! | 2003-10-17 : 12:10

Momentu hauetan leloaz sortzen ari den eztabaida hau sineskaitza iruditzen zait. Gertatzen ari den guztia gertatuta, eta euskalgintza jasotzen ari den egurra ikusita, aitzakia bat iruditzen zait. Leloaren eztabaidan manifestaziora ez joateko aitzakia dagoenaren susmoa dut. Leloan dagoena egonda ere, denok dakigu larunbatean han egongo garenok zer esateko egongo garen han, dena parkartako lelo batean sinplifikatu gabe. Manifestaziora joan nahi ez duena, ez dadila joan, baina ez dezala leloaren aitzakia jarri kontzientzia lasaitzeko. Momentu hauetan eztanbbaida horretan indarrak jartzea ez zait batere egokia iruditzen (neu horretan ari banaiz ere. gizakiaren kontraesanak!)
Bihar ikusiko gara. Mikel eta besteak askatu! Euskalgintzan dabiltzanei utzi behingoz beraien lana lasai egiten!

Oarsoaldeko Hitza-ko soslaia | 2003-10-17 : 16:10

Hona hemen gaur 'Oarsoaldeko Hitza' euskarazko egunkarian Mikel Azkune azpeitiarrari buruz argitaratu duten soslaia (Errenterian bizi da Mikel):
"Kiroltasuna oinarri.
Lan egitetik, militantziatik heldu zen Mikel Azkune euskal kulturaren mundu arriskutsura.

Abenduaren 23 batean sortu zen, 1967. urtean, Azpeitian. Bertan eman zuen bere gaztaroa, alde batera eta bestera korrika beti, ezin gelditu. Horrelakoxea baita Azkune, kirolzale amorratua.
Oinarrizko hezkuntza Azpeitiko ikastolan hartu zuen. Gaztaroan, unibertsitatera joan zen, Kazetaritza ikastera, eta Publizitatean berezitu zen.
Bitartean, gazte askoren moduan, bere hizkuntzarekiko kezkak, zenbait saltsatan sartzera bultzatu zuen. Korrika-ren aldeko ekimenetan antolatzaile jardun zuen, eta baita 'Egunkaria'-ren aldekoetan ere. Garai batean 'Egunkaria'-k antolatzen zituen Tonbolak eta antzekoak gauzatzen laguntzen jardun zuen. Langileak, bolondresak behar izaten ziren, eta azpeitiarrak beti aurkitzen zuen laguntzeko tartea.
Modu horretan hasi zen komunikabideen unibertsoan sartzen, azpi-azpitik, lanik gogorrena egitetik. Gutxinaka erantzukizuna hartzen joan zen, bere lanak horretara bultzatzen zuelako, eta, konturatzeko, sekulako eskarmentua zuen harremanen munduan.
Bestetik, 'Egunkaria'-ren sorreran herri batzordean ibili zen Mikel Azkune, eta sekulako lana egin zuen euskarazko lehen egunkariak argia ikus zezan.
Kirolzalea ere bada, lehen esan bezala. Futbola atsegin du, lagunekin eta saioren bat egitea, eta baita korrika egitea ere. Bitan egin du maratoia, esaterako. Urtero-urtero, gainera, Donostia-Behobia proba egiten du.
Bere ezaugarrietan nabarmenena, ordea, beste hau da: bere bi haurrak. Aita izan zen, duela bi urte lehenik, eta iaz ere bai. Eta horixe azpimarratzen dute ezagutzen dutenek: aita amorratua dela. Eta huraxe omen da bere biziorik handiena.

zure lagun Alberto, Elgoibartik | 2003-10-17 : 21:10

zenbat aldiz eta zenbat hitzegin genuen...Azkenengoz, Iñakiren baserrian Bizkai aldean izandako bazkariaz nuen berri, eta hara orain...lehen baitlehen aska gaitezen.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu