Oraindik ez da ziurra Azpeitian EAJ-EA koalizioa egingo denik

Uztarria.eus 2003ko urt. 30a, 19:01

EAJko eta EAko zuzendaritzek gaur prentsaurrean esan dutenez, bi alderdiek akordio zabala lortu dute Arabako, Bizkaiko, Gipuzkoako eta Nafarroako maiatzeko udal hauteskundeetarako —"biztanleriaren %90 harrapatzen duena"— eta, akordioaren arabera, zerrenda bateratuak aurkeztuko dituzte 123 herritan. Azpeitiko kasua ez dago erabat baieztatua.

Herenegun gauerdian lortu zuten akordioa, eta ordutik esan izan denez, Azpeitian batera joango dira EAJ eta EA. Den den, EAko Herri Batzordeak gaur arratsaldeko lehen orduan artean ez zeukan herriko balizko koalizio horri buruzko informazio askorik, eta, Uztarriak jakin duenez, ez da ziurra Azpeitian bi alderdiak maiatzeko hauteskundeetan batera joango direnik. Izan ere, EAk garrantzia ematen dio EAJk aurkeztuko duen zerrendaburuari.

Koalizioko alkategaia betiere EAJkoa litzateke, jeltzaleak izan zirelako 1999ko udal bozetan bozkatuenak, eta une hauetan EAJn bere hautagaia zein izango den hitz egiten ari dira. Iturri jeltzaleek orain dela gutxi Uztarriari adierazi ziotenez, otsailean erabakiko dute zein izango den alkategaia. Jose Mari Bastida gaur egungo alkatea bera da hautagaietako bat, eta EAk aukera hori ez du begi onez ikusten. EAJko eta EAko zuzendaritza nagusiek, ordea, ziurtzat ematen dute Azpeitian bi alderdiak batera joango direla; izan ere, Uztarriak jakin duenez, EAk orain dela egun gutxi EAJri pasatu zion proposamenean Azpeitian batera joatea jartzen zuen, EAJkoa izanik zerrendaburu, eta, jakina, EAJko zuzendaritzak onartu egin du hori.

Bi alderdietako zuzendaritzak Azpeitiko kasuan (ere) ez lukete nahiko besterik gertatzerik, "funtsezkoa" delako ahal den herri gehienetan batera joatea. Josune Ariztondo, EAJko Euzkadi Buru Batzarreko idazkariaren esanetan, akordioa "orekatua eta onuragarria" da bi alderdientzat, eta "merezi izan du akordiorako egon den prozesu luzeak. Alderdikeriak alde batera utzi eta gizartearen gehiengoak nahi zuen akordioa lortu da".

Onintza Lasa, EAko komunikazio arduradunak esan duenez, berriz, "akordioa lortzea ez da erraza izan", eta bere alderdiak "ahalegin handia" egin du, "erakundeetan subiranotasunaren aldeko indarra bermatzeko".

EAJrentzat eta EArentzat "oso garrantzitsua" da batera aurkeztea, Juan Jose Ibarretxe EAEeko lehendakariaren planari indar handiagoa emateko.