Patxi Saezi, Azpeitiko euskara teknikari eta euskararen protagonistari erantzunez

Mikel Olaizola Borda | Iritzia
2002ko abe. 1a, 13:12

Gauza polit asko esan, baina fundamentuzko lan gutxi. Gezurra nagusi.

Lehenik eta behin esan beharra daukat, nere asmoa ez dela eztabaida antzutan sartzea, era berean nere asmoa ez da pertsona zehatz batzuren aurkako gurutzada egitea, baina zoritxarrez, orain arte egin dutena eta orain egiten ari direna ikusirik, ezin naiz isilik geratu. Herritarroi iruzur egiten zaigunean, edo hobeto esanda "aurpegira parre egiten zaigunean" gertatzen dena salatu beste biderik ez daukagu. Eta noski, iruzur hori egiten dutenak, izen abizenak dituzte; Patxi Saez, Aitor Gorrotxategi...

Patxi Saezen erantzunaren inguruan, esan, idatzi nuen guztia modu perstonalean idatzi nuela, ez baitut, bera bezala erakunderik ordezkatzen. Zerbaitegatik jarri nituen nire izen abizenak, erakunderenbat ordezkatuko banu, erakundearen izenean idatziko nuke. Nik uste, garbi geratu zela nire izenean idatzi nuela guztia, baina Patxik, orain ere mamuak eta susmoak zabaldu behar lau haizetara. Berak dioenez, modu pertsonalean eman du bere erantzuna, ondo da, baina bera udal langile bat da eta hori ezin dugu ahaztu.

Orain ere, beste askotan bezala, gure Patxik informazio pribilegiatua, bere aldeko erabili du, ez dauka inork jakin beharrik nik sinatu nuen edo ez. Informazio hori ezin dugu herritarrok ezagutu(berak ala esan zigun behintzat) eta Patxik zer egiten du eta bere intereserako erabili. Patxik egin duena ez da legezkoa, beraz dagokion lekuan azalpenak eman beharko ditu.

Patxi Saez ezagutzeko aukera izan dugunok, argi ikusi dugu zein den bere lan egiteko modua, leku batean gauza bat esan eta ondoren justu kontrakoa egiten, abila dugu gizon hau, gezurrak... zabaltzearekin batera.

Berak dio, nik eta nire sokakoek nahi duguna egiten ez den bitartean suntsitzaile aurkitzen garela. Ez dakit zer esan nahi duen, bere sokakoek horrekin, baina azaldu beharko du. Berak ondo daki, orain ere gezurretan ari dela, ni beti egon bainaiz edozeinekin lan egiteko prest, nahiz eta hainbat eta hainbatetan zaplastekoak jaso. Ez da nik eta "nire sokakoek" nahi dudana egitea nire helburua, baizik eta herriak behar duena egitea, herriarekin batera eta herriarentzat, hitz gutxitan esanda, euskara normalizatzea guztion artean.

Azpeitian, kontseiluaren plan estrategikoa martxan jartzera gindoazela, bai eukalgintza, bai gizarte eragileak eta bai udalaren eskutik, Azpeitiko udalak bizkarra eman zigun guztioi, tartean baita Patxik ere. (Pluralean idazten dut, euskalgintzaz ari naizelako, baina ez talderen baten ordezkari naizelako). Hala ere, modu suntsitzailean lan egin beharrean, modu eraikitzailean lan egiten jarraitu genuen, bi planen uztarketa eskatuz, Patxirekin eta Aitor Gorrotxategirekin bilerak eskatuz... Hauen erantzuna, ezezko borobila uztarketari. Beraiek bakarrik eta beren erara egingo zutela guztia, euskalgintzari aholkulari papera eskainiz. Beraiek beren erara eta bakarrik egingo balute, gaitzerdi, baina hori ere ez dute egiten. Zenbat bilera eskatu zaizkizue euskalgintzatik? Auskalo zenbat, lehendakariarekin biltzea errazagoa izango da, zuekin biltzea baino.

Baite-ren sorreran, Patxik ere parte hartu zuen, berak zioen moduan ez euskara teknikari bezala, modu pertsonalean baizik. A ze motibazioa, Beasaingoa izanik, Azpeitiko euskara elkartean lanean ibiltzeko! Benetan eskertzekoa da hau eh? Ba modu pertsonalean agertzen bazinen, zergatik behin baino gehiagotan fitxatu zenuen, bilera amaitu ondoren? (Bilerak, institutuan dagoen udal euskaltegian egiten genituen)Zer kontatzen zenituen ordu haiek, lan ordu bezala?

Patxi aurreko nere idatzian, galdera pila bat planteatu nizkizun beste hainbatetan bezala eta zuk betiko moduan, ez duzu bat bera ere erantzun. Zer gertatzen zaizu, ez dakizkizu erantzunak? Edota ez zaizu komeni erantzutea?

Nik orain arte bezala, ERLEARENA egiten jarraituko dut. Alde batetik, nire erreginaren(euskararen) etxea eraikitzen jarraituko dut, horretarako prest dagoen edonorekin batera, baita udala ere eta bestalde erleak ohikoa duen legez, etxearen eraikuntzan ardura duten guztiak, nire hegalen bidez ateratako zaratarekin molestatuko ditut, tartean behin, ziztadaren bat edo beste ematearekin batera.

Bukatzeko, laister gabonak datozela eta, OLENTZERORI ondorengoa eskatu nahi nioke:

-Udalak, Patxi Saez euskara teknikaria, haur eta gazteentzat literatura idaztera bideratu dezala. Haur eta gazteentzat liburuak idazteko eta tartean behin hitzaldiren bat emateko liburutegian, oso ondo idazten baitu.

-Udalak, euskara teknikari berri bat kontratatu dezala, Azpeitiarra eta protagonismo nahirik gabe, edonorekin lan egiteko prest egongo dena.

-Behingoz udala, euskalgintzarekin eta gizarte eragileekin batera, serio lanean hasi dadila eta kanpora begirako ekitaldi politak alde batera utzi ditzala.

-Azpeitiko herria, euskararen inguruan zer egin asko dagoela jabetu eta kontzientziatu dadila.

-Euskara Euskal Herri osoan OFIZIALA izan dadila.

Bidali:  

Erantzunak

Ion Gonzalo. | 2002-12-02 : 14:12

Nik uste nahiko argi geratu direla gauzak artikulu guziak irakurri ondoren. Hala ere oso gogorra iruditu zai fitxatzearen kontu hori. Hau egia bada, eta Mikeli sinisten diot, Patxik dimititu egin behar luke.

Azkoitiarra | 2002-12-03 : 10:12

Irakurri dut nire iritzia azaltzeko identifikatu beharra daukadala. Momentuz hori ez egitea erabaki dut, gero eraginik ez dezan izan Azkoitian martxan dagoen euskara azpibatzordean, baina Uztarriari eskertuko nioke iritzi artikulu hauetan azaltzen den kezka nagusiena argitu dezan: zer egin den urte oso batean "Biziberritzeko plan" famoso horren garapenean eta aurrerantzean zer egiteko asmoa duten.

Enekoitzek | 2002-12-03 : 12:12

Azkoitiarrari: Azpeitiyen, aurtengo maiatzetik, euskararen gaiko informaziyue Baite Euskara Elkartearen hileroko aldizkariyek ateratzen du, eta Uztarriak gehiyenez ere lan osagarri bat egiten du, hala erabaki zalako danan artien ¬óBaiteko kide da Uztarria Kultur Koordinadora¬ó. Aste hontan zortzi orrialdeko zenbakiye atera beher du Baitek eta lehengo zapatuen prentsaurrekue eman zuen. Eta oraingo aldizkari hontan badago EBPNri buruzko artikulu luze bat, baloraziyo kritiko batekin. Artikulu hortan esaten da Baitek iye informaziyoik ez dula Biziberritzeko Plan 'famoso' horri buruz.
Udalak atera zuen lehengo astien orri berri-emaile bat, zoritxarrez berri askorik ekartzen ez zuen orriye izen arren.
Ea zuek Azkoitiyen suerte hobio daukezuen.

Mikel Uralde | 2002-12-03 : 15:12

Mikel Olaizola,aurreko idatzi batean eman izan nuen nire opinioa Patxi eta zure artean sortu eztabaidaren inguruan. Ez dut euskara teknikariaren lana zuritzerik nahi (zuritzerik ba ote?), baina oraingo honetan zure idatzien tonuaz eta idazkeraz gauzatxo bat esatea otu zait.
Ez zaizkit gustatu, naiz eta litekeena den arrazoia izatea, zure argumentuak azaltzeko garaian erabili dituzun akusazio merke, iraingarri eta kontestutik kanpokoak. Ez zait iruditzen tonu biltzailea denik zuk erabilia (suposatzen dut helburua ere ez zela hori izango) eta esanak egiak izan badaitezke ere hobeto alderatuta azaltzen ez badira ezin dira publiko egin. Horrelako plataforma batek herriko gaietaz eta erabakietaz eztabaidatzeko aukera paregabea ematen digu. Zerbait aportatzeko aukera zuzena izateaz gain herritarren espiritu kritikoa ziztatzeko balio du besteak beste (egunero ditugu horren adibideak). Geure artean iraintzeko erabiltzen badugu gero eta herritar gutxiagok erabiliko dutenaren susmoa daukat.
Beste alde batetik, Mikel, zure idatziak badu alderdi positiboa eta tristea aldi berean. Erlearen lana oso fin egin duzu, ze ondo antzeman baitu antzeman behar zuenak. Orain, ondo tristea da horrela idatzi behar izatea zerbaiten aurrean udaleko norbaitek azalpen minimo bat ematera ausartzeko gai honen inguruan (beste batzuk ez aipatze arren). Hor ere neurtzen da norbanakoaren lana.

Mikel Olaizola Borda | 2002-12-03 : 19:12

Mikel Uralderi erantzunez, esan beharra daukat, badakidala tonu ironikoa, salaketa gogorrak... egin ditudala. Baina zoritxarrez beste biderik ez dut ikusi, Azpeitian euskararen inguruan bizi dugun egoera tamalgarria plazaratzeko. Orain arte gauza politak esaten ibili izan naiz, hainbat alditan pentsatzen eta sentitzen nuena barnean gordetzen. Baina halako batean, buruak nahikoa da esaten dizu eta pentsatzen duzun hori azaleratu egiten duzu.
Eta badakit pena bat dela, honelako argumentuak, salaketak...erabiltzea, baina beti ezin dugu agerikoa dena gorde. Batzutan jakin egin behar da, pentsatzen duzun hori gordetzen, beste modu batean azaltzen... Baina egia esango dizut, zenbat gorde dudan jakingo bazenu! Ni elkarlaren alde azaldu naiz, hori argi dago ezta?
Ea ba, beste batzuk elkarlanaren alde azaltzen diren.
Animo eta segi lanean.

uztarria.com | 2002-12-05 : 13:12

BORDARI erantzuna kendu egin dugu ez dituelako anonimotasunari dagozkion arauak errespetatzen.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu