Aurtengo lan hitzarmenaren negoziazioaren baitan, sindikatuek (ELA, STEE-EILAS, LAB, CCOO, UGT) gutxieneko eskakizunak adostu dituzte elkarrekin. Badira bi hilabete lan hitzarmena negoziatzeko mahaia hautsi zela eta hilaren 17ko grebarako dei bateratua egin dute. Greba egun horrek izaten duen eraginaren arabera neurtuko dute sindikatuek hortik aurrera zein urrats eman.
Patronalari egindako eskaeren artean honakoak dira langileen ordezkaritzak ezinbesteko jo dituenak:
-lan orduak gutxitzea langile guztiei (irakasleen kasuan eskola orduak gutxitzea)
-lan hitzarmena ikastetxeetan lanean ari diren guztiei aplikatzea (Haur Hezkuntzako langileak)
-Hezkuntza Bereziko langileen egoera hobetzea
-homologazioa lortzeko bidean, soldata igoera langile guztientzat
EAEko irakaskuntza pribatuan urte askotako langileen eskakizun nagusia, irakaskuntza publikoko langileen lan-baldintzekin parekotasuna lortzea izan da. Homologazioa deritzana alegia, publikarekin parekotasuna bai lan-ordutan eta bai soldata aldetik ere.