Uztarria.com-eko eztabaida: elkarteetan emakumeak bazkide izateko eskubidearen ingurukoa

Izarraitzpeko Sorginak | Iritzia
2002ko api. 25a, 21:04

Orain dela hilabete batzuk, Uztarria Kultur Koordinadorak webgune hau martxan jarri du, bertan herriat guztiak parte hartzeko eztabaida gunea jarri duelarik. Bazterketarik gabe herritar ororen (emakumezko nahiz gizonezko) iritzia jasotzen duen txoko hau egotea bere izaera irekiaren adierazle da.

Herrian dauden elkarte gastronomiko gehienetan, emakumeak bazkide ez izatearen gaiari helduz, Azpeitiko emakume taldeak zera esan nahi dugu:

-Parte hartzaile askoren iritziak penagarriak dira. Lotsa gutxi behar da horrelako jarrerak izateko.

  • Esaten da emakumea gero eta esparru gehiago irabazten ari dela. Baina badirudi, gauzak ez direla asko aldatu.
  • Emakumea horrela irudikatzen duten pertsonak, emakumearen zapaltzaile hutsak dira.
  • Gaia ez da inongo seriotasunez landu. Emakumea iraindua izan da, eta ez pertsona bezala tratatu. Adibide moduan, "Arrain buru batekin" konparatua izan da.
  • Tristeena zera da: gune honetako partehartzaileen gehiengoa gazte jendea dela. Aurreraka joan beharrean atzeraka ote goaz bada?
  • Azken finean, elkarte gehienetan herritarren erdiari atea isten zaio, BAZTERTUA izanik.
  • Elkarte askotako jarrerak mentalitate matxista eta itxiaren islada dira.
  • Hala eta guztiz ere, erantzun guztiak ez dira berdinak izan, eta eskerrak batzuk gaia seriotasunez hartu dutela.
  • Azkenik aipatu, herriko gune irekietan (elkarte, herriko jaiak,...) emakumeok parte hartzeko eskubidea dugula, inongo bazterketarik gabe.

EMAKUMEAK EDONON!

Bidali:  

Erantzunak

naxi | 2002-04-26 : 12:04

Arrazoi guztia ematen diet Izarraizpeko Sorginei. Eta Uztarriak planteiatu duen gaia dela eta, zera esan nahiko nuke: batzuentzat lotsagarria izan daiteke galdera bera planteatzea, baina benetan lotsagarria dena da galdera planteatu beharra izatea. Alegia, Uztarriako lagunei esan nahi diet gaia bera ondo planteatu dutela, gizarteko egoera ere halakoxea delako. Agian, egia da gauza gehiegi ere ezin direla esan gaiaren inguruan, baina egia da ere badirela bene-benetan emakumeak soziedadeetan ez sartzea defendatzen duten azpeitiarrak. Non daude?

IRAULI | 2002-04-26 : 15:04

Naxi, ez negok hirekin ados. Egia duk azpeitiar mota hori badela, beltzak ikusi ere egin nahi dituen jendea baden bezela, edota beste hainbat astakeria defendatzen duen jendea baden bezela. Horregaitik ez zaidak batere egokia iruditzen jende horri eztabaidarako gune bat eskaintzea, jende horrek ez baitik eztabaidarako gaitasunik. Eztabaida bera irakurtzea nahikoa duk hori frogatzeko. Azkenean katxondeo bat bihurtu duk, besterik ez.

Ximela | 2002-04-26 : 17:04

Emakume taldeak azaltzen duenarekin ados nago, denok pertsonak garelako izenez eta izatez.
Web-gunea irekia denez, edozein sartzen da bertara iritzi egoki edo desegokiak ematera, iraintzera edo besterik gabe adarra jotzera.
Oraingo eztabaida honetan irakur ahal izan ditugun zentzugabekeri batzuk zenbait azpeitiar (gazte)-ren pentsakera adierazten badute, etorkizun itxaropentsua daukagu.
Mende erdia pasa daramat munduan, eta uste nuen aurreraka zihoan trenean nindoala, baina badirudi bagoi batzuk bidean gelditzen, edo okerrago, atzeraka joan direla.
Badirudi azken urteotan gorputza gerritik behera asko landu dela, eta lepotik gorakoa berriz ekonomikoki bizitza erosoagoa lortzeko ikasketarako bakarrik erabiltzen dela.
Ez azpian
ez gainean
elkarren parean
askatasunean.

Irauli-ri | 2002-04-26 : 17:04

Arrazoia duk eztabaida katxondeo bat bihurtu dela esaterakoan, baina ni ere ez nagok erabat ados hirekin. Ezen, kontua ez duk era horretako jendea badela, kontua duk era horretako jendearen jarrera inposatu dela Azpeitian. Agian hanka sartzen ariko nauk, baina jakin nahiko nikek Azpeitiko zenbat soziedadetan daukaten neskek sozio izateko aukera. Ba hori, jende horri, nik ere, eta gu haien gainetik bagina, ez nioke eztabaidarako batere gunerik eskainiko; ignoratu eta kitto Baina beraiek daude gure gainetik. Eta haien gainetik jartzeko bide asko daude; haietako bat, diskurtsoa, eztabaida.
Hala ere, berriro esango diat: niri ere katxondeo bat iruditzen zaidak webgunean sortu den eztabaida, eta Uztarriakoei: zergatik ez duzue aldatzen (ez dakit zenbat denboraero aldatzen duzuen, baina...)

Irauli-ri | 2002-04-26 : 18:04

Arrazoia duk eztabaida katxondeo bat bihurtu dela esaterakoan, baina ni ere ez nagok erabat ados hirekin. Ezen, kontua ez duk era horretako jendea badela, kontua duk era horretako jendearen jarrera inposatu dela Azpeitian. Agian hanka sartzen ariko nauk, baina jakin nahiko nikek Azpeitiko zenbat soziedadetan daukaten neskek sozio izateko aukera. Ba hori, jende horri, nik ere, eta gu haien gainetik bagina, ez nioke eztabaidarako batere gunerik eskainiko; ignoratu eta kitto Baina beraiek daude gure gainetik. Eta haien gainetik jartzeko bide asko daude; haietako bat, diskurtsoa, eztabaida.
Hala ere, berriro esango diat: niri ere katxondeo bat iruditzen zaidak webgunean sortu den eztabaida, eta Uztarriakoei: zergatik ez duzue aldatzen (ez dakit zenbat denboraero aldatzen duzuen, baina...)

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu