Gure Marrak munduko kontakizun ilustratuen bildumaren aurkezpena izan zen atzo Sanagustin kulturgunean. Hamar narrazio ilustratuz osatutako bilduma iazko udazkenean Dinamoan egindako izen bereko tailerraren emaitza da eta Kulturaz kooperatibak argitaratu du. Bilduma Sanagustin kulturgunean eros daiteke, 25 euroren truke.
Atzoko aurkezpen ekitaldian parte hartu zuten Maite Mutuberria tailerreko dinamizatzaileak, Xabier Gantzarain Kulturaz kooperatibako kideak eta Maite Azpiazu, So Saito eta Marta Trigo Gure Mintzak ekimeneko kideek.
Bildumak eskualdean bizi diren herrialde desberdinetako hamar lagunen kontakizunak dakartza, jatorrizko hizkuntzan eta euskaraz idatzita, eta tailerrean parte hartu duten beste hainbeste ilustratzaileren marrazkiz lagunduta.
Album ilustratua Kulturaz kooperatibaren Gure Mintzak proiektuaren barruan osatu da. 2020an abiatu zen egitasmoa, batez ere Azpeitian eta Urola Erdian hitz egiten diren hizkuntzen eta hizkeren grabazio funtsa eratzeko. Bertako herritarren kultur aniztasuna ezagutzera emateko proiektu eta tresna bat da. Besteak beste, herrialde ezberdinetako kontakizunak bildu ziren grabazio funts hartan.
Lehen ekinaldi hari tiraka, iazko udazkenean kontakizunak ilustratzeko tailerra antolatu zen Dinamoan. Leire Bilbao eta Maite Mutuberriaren gidaritzapean, kontakizunari lagunduko zioten ilustrazioak sortu zituzten tailerreko parte hartzaileek. Narrazio ilustratuak argitaratuta eman zaio amaiera tailerrari. Dena den, proiektuak beste hainbat ekimenekin aurrera jarraituko du.
Ondorengo lotura hauetan daude ikusgai atzoko aurkezpeneko argazki galeria, tailerraren inguruko bideoa, tailerreko argazki galeria eta Gure Mintzak proiektuko grabazio funtsa.
