Esku pilotako goi mailako izarrak ez ezik, palista profesionalak ere kantxaratuko dira aurtengo saninazioetan Izarraitz pilotalekuan.
Bihar izango da palaren txanda Izarraitzen. 22:00etan hasiko da jaialdia, eta Ibarguren eta Ibai Perez Maldonado eta Oier Alkorta azpeitiarraren kontra lehiatuko dira jaialdiko partida nagusian, profesionalen mailakoan. Aurretik eta ondoren, berriz, Ilunpe Erreminta saileko palistak izango dira protagonista. Profesionalen partidaren aurretik, Ilunpeko sei palista gaztetxo ariko dira jokoan. Jaialdia osatzeko, berriz, afizionatu mailako neurketa jokatuko dute profesionalen partidaren ondoren, eta elkarren kontra ariko dira Martija eta Lopetegi azpeitiarrak: Letamendia atzean duela ariko da Martija, eta Ibarguren izango da Lopetegiren aurrelaria.
Sarrerak 5 eurotan jarri dituzte, eta bihar bertan erosi ahal izango dira Izarraitz pilotalekuko leihatilan.