Euskararen aldarria lau haizetara zabaldu dute herriko haurrek eta gaztetxoek gaur goizean, Korrika Txikiaren bidez. Haur Hezkuntzako laugarren edo bosgarren mailatik Lehen Hezkuntzako seigarren mailara arteko ikasleek parte hartu dute ekintzan, eta jendez gainezka egin dute herriko kaleek. Azpeitiko Ikastola Ikasberriko, Iraurgi Ikastetxeko nahiz Azpeitiko Ikastola Karmelo Etxegaraiko ikasleak eta irakasleak aritu dira lasterka, baita zenbait guraso ere.
10:15ean igerilekuaren aurretik abiatu da Korrika Txikia, eta anbulatorio aurretik igarota, Alde Zaharreko kaleetan barrena ibili ostean, plazan amaitu du ibilbidea. Ekitaldiarekin bukatzeko, Korrikaren mezua irakurri dute zenbait ikaslek udaletxeko balkoitik, eta alkateak ere hartu du hitza. Ondoren, Juan Antxieta musika eskolakoek kioskoan kantu batzuk jo dituzte, eta haien doinuekin, kantuan eta dantzan aritu dira ikasleak. Gozatu ederra hartu dute plazan elkartu diren hainbat eta hainbat gaztetxok.