Gaurkoan herriko gaztetxoak dira #EtxeanJolas saioko protagonistak. Txiki-txoko ludotekako hezitzaileek proposatutako abentura parkea egin dute herriko hainbat gaztetxok beren etxean, eta ederki pasatu dute jarritako oztopoak igarotzen, Honako bideo hau bidali dute egindakoa erakusteko.
Konfinamendu egoera dela eta, Azpeitiko haurrei eta horien gurasoei egunak pixka bat arintzeko asmoz #EtxeanJolas egitasmoa jarri dute martxan Urolako Komunikazio Taldeak eta Azpeitiko Udaleko Gazteria Sailak elkarlanean. #EtxeanJolas egitasmoaren barruan, Azpeitiko Txiki-Txoko eta Iturritxiki ludoteketako hezitzaileek haurrentzako hainbat bideo egingo dituzte, eta saio horietan etxean egin daitezkeen eskulanak, asmakizunak eta jolasak proposatuko dituzte, besteak beste. Batzuetan ludoteketako hezitzaileak izango dira proposamenak egingo dituztenak, eta beste batzuetan, aldiz, haurrak.
Bidali zuen argazkiak eta bideoak
Aurrerantzean, #EtxeanJolas egitasmoaren barruko saioetan egindako jolasak, eskulanak eta bestelakoak etxean egiten dituzten lagunek argazkiak bidaltzeko aukera izango dute, ondoren Uztarrian argitaratzeko. Bertan proposatutako ekintzez gain beste hainbat jolas eta eskulan proposatzeko aukera ere izango dute. Horretarako, argazkiak eta bideoak honako telefono zenbaki hauetara bidali beharko dira: 680 19 88 63 (Iturritxiki) eta 680 22 92 81 (Txiki-txoko).
Egunero 16:00etan eskainiko dute #EtxeanJolas saioa Uztarria.eus-en. Egitasmoaren helburua da haurrek ludoteketan egin ohi dituzten ekintzak herriko etxeetara gerturatzea, egunak pixka bat dibertigarriago egiteko.