Azken aste hauetan, hondakinak biltzeko zerbitzua murriztu dute Urola Erdiko Mankomunitateko kideek COVID-19 gaitzaren eraginez: arropa eta bolumen handiko zaborren bilketak ez daude martxan eta Garbigunea itxita dago, besteak beste. Hondakinak "maiz" edukiontzien kanpoaldean agertzen direla ohartarazi du, ordea, mankomunitateak; batez ere, arropa eta bolumen handiko hondakinak (altzariak eta traste handiak). Horrenbestez, hondakinak ondo sailkatzea eta kalea zein edukiontzien eremuak garbi mantentzea herritar guztien betebeharra dela jakinarazi du mankomunitateak.
Gai horren harira, herritar batek atzo salatu zuen Artzubia kaleko arropa biltzeko edukiontzien ondoan poltsa ugari zeudela.