Gipuzkoako Herriartekoaren I. Gomazko Paleta Txapelketaren finala jokatuko du Azpeitiak datorren San Juan egunean, finalaurrekoetan Zumarraga kanporatu ondoren. Atzo arratsaldean jokatu zuten finalaurrekoaren itzulerakoa Urrestillako Txikuri pilotalekuan, eta joanekoan Zumarragan lortutako emaitza berarekin nagusitu ziren Azpeitiko pilotariak, 2 eta 1.
Zumarragan bezala, buruz buruko bi partidak irabazi zituen atzo Azpeitiak. Frontoi osokoan, Urtzi Lopetegi 20-14 nagusitu zitzaion Rodriguezi, itzulerakoaren lehen partidan. Binanako neurketan, aldiz, Zumarragakoentzat izan zen puntua; 20-14 galdu zuten Eneko Martijak eta Oier Alkortak Anduezaren eta Vianaren kontra. Kanporaketa hiruna zela ekin zioten, beraz, partida erabakigarriari Asier Egiguren azpeitiarrak eta Juanena zumarragarrak. Joanekoan ozta-ozta irabazi zuen Egigurenek (19-20) Azpeitiari itzulerakorako abantaila eman zion partida; atzo, berriro lortu zuen garaipena eta, horrekin batera, finalerako txartela ere bai, 20-15.
Finala, Donostian
Donostiako Altzako frontoian jokatuko dute ekainaren 24ko finala, 11:00etatik aurrera. Aurkari zein izango duen jakitea falta zaio Azpeitiari, Hernani ala Donostia, bigarren finalaurrekoaren itzulerakoa igandean jokatuko baitute, Hernanin; joanekoan, 2 eta 1 irabazi zuen Donostiak.