Udako ikastaroak emango dituzte aurten ere Azpeitiko Udal Euskaltegian eta ireki dute dagoeneko izen-ematea. EGAko eta HABEren C1 eta B2 mailetako tituluak eskuratzeko eskolak emango dituzte, ekainaren 25etik uztailaren 24ra arte; ikastaro trinkoak izango dira, egunero bost orduko saioekin.
Hilaren 15a arte eman daiteke izena. Ikastaroren batean izena eman nahi dutenek bide hauek dituzte eskura: Udal Euskaltegira joatea (Perdillegi kalea, 1), 943 81 19 47 telefono zenbakira deitzea, edo euskaltegia@erabili.eus helbide elektronikora mezua bidaltzea.
Ikasleentzat eta langabetuentzat matrikula doan da. Gainerakoek 158 euro ordaindu behar dituzte, baina euskaltegiak eskaintzen duen beka eta diru-laguntza sistemarekin matrikula osorik berreskuratzeko aukera izango dute, baldintzak betez gero; ikastaro amaieran %85eko asistentzia erreala izatea da matrikulatzerakoan ordaindutakoa berreskuratzeko bete beharreko baldintza.