1-2 galdu du Azpeitiak gomazko paletako Gipuzkoako Herriartekoaren final zortzirenetako kanporaketaren joanekoa, Elgoibarren kontra, baina itzulerakoan emaitzari buelta emateko aukerak mantentzen ditu; partida bakarra irabazi arren, guztira 13 tantoren aldea atera diote Elgoibarri joanekoan.
Zapatuan, Urrestillako Txikuri pilotalekuan, Urtzi Lopetegi Lopek 16-20 galdu zuen buruz buru frontoi osoan jokatutako partida. Frontoi osoko binakakoan ere Elgoibarkoak izan ziren irabazle, Eneko Martijak eta Oier Alkortak oso estu hartu bazituzten ere: 19-20 izan zen azken emaitza, kanpokoen alde. Askoz alde garbiagoarekin lortu zuen Asier Egiguren Bikutzek azpeitiarren aldeko puntu bakarra; 20-2 irabazi zuen goizeko azken neurketa, zazpi koadro barruko buruz buruko lehian.
Ostiralean jokatuko dute kanporaketaren itzulerakoa, Elgoibarren. Bi partida irabazi beharko dituzte han Azpeitiko ordezkariek txapelketan aurrera egiteko.