Espainiako Guardia Zibilak gaur goizean egindako atxiloketak salatzeko elkarretaratzea deitu dute biharko. Kalera Kalera dinamikako bozeramaile Oihana Garmendia eta Antton Lopez Kubati eta Nafarroako Sortuko arduradun Miren Zabaleta eta Olatz Dañobeitia atxilotu dituzte, Belen Gonzalez ETAko preso ohiaren omenaldian "terrorismoa goratzea" egotzita. Donostiako Intxaurrondoko kuartelean deklarazioa hartu ostean, lau atxilotuak aske utzi ditu Guardia Zibilak arratsaldean.
Atxiloketa horiek gaitzesteko mobilizazioak deitu ditu Kalera dinamikak herriz herri, Bakearen eta askatasunaren alde. Ez gaituzue geldituko lelopean. Azpeitian hamabost minutuko elkarretaratzea egingo dute plazan, 19:00etan hasita.
Ezker abertzalearen inguruko solasaldia
Elkarretaratzea amaitzean, Orkatz Kultur Elkartearen 25. urteurrenaren harira antolatutako Ezker abertzalearen historia solasaldia izango da Sanagustin kulturgunean, 19:15 aldera. Floren Aoiz arduratuko da biharko hitzaldia gidatzeaz.