Udalak bat egin du biharko greba deialdiarekin

Uztarria.eus | Udala | Artikulua
2018-03-07 16:33

Udalak bat egin du mugimendu feministak biharko deitutako emakumeen greba deialdiarekin. Atzoko udalbatzarrean aho batez onartu zuten testua EH Bilduk eta EAJk. Udal taldeek ez zuten udal adierazpenik onartu, baina grebari "ekarpena" egin nahi izan diote: erakundeak aurreratu du denboraren erabilera sozialari buruzko azterketa egingo duela datozen hilabeteetan.

Atzoko udalbatzarrean grebaren aldeko boza eman zuten udal ordezkari guztiek. (Azpeitiko Udala)  Ikusi haundiago | Argazki originala

Azpeitiko Udalak bat egin du mugimendu feministak biharko deitutako emakumeen greba deialdiarekin. Atzoko udalbatzarrean aho batez onartu zuten testua EH Bilduk eta EAJk.

Honako hau da atzoko udalbatzarrean udaleko bi alderdiek onartu zuten testua:

"Ez da ohiko lan greba bat izango; enplegu grebaz gain, kontsumo grebara, hezkuntza grebara eta zaintza grebara batzeko deialdia egin delako.

Gure gizartearen ongizatea ezinezkoa da bizitzari eusteko ezinbesteko jarduerak egiten ez badira, hala nola pertsonen zaintza –haurrak, adinekoak, mendekoak...– edo etxeko lanak egiten ez badira. Lan horietako gehienek ez dute ordainsaririk, eta, batez ere, emakumeek egiten dituzte.

Gizon eta emakumeen berdintasuna lortzeko oztopo nagusietakoa denboraren erabilera da, desoreka handia baitago emakumeek eta gizonek eremu publikoan eta pribatuan igarotzen duten denborari dagokionez.

Azpeitiko Udalak aurtengo martxoaren 8an mugimendu feministak egindako deialdia errespetatuz, ez du ohiko udal adierazpenik onartuko, baina grebaren deialdiaren helburuarekin bat eginez, grebari ekarpena egin nahi dio. Zaintza lanak erdigunean jartzeko helburuarekin, eta, batez ere, azpeitirrok denbora zertan igarotzen dugun aztertzeko, denboraren erabilera sozialari buruzko azterketa egingo dugu datozen hilabetetan. Beraz, azpeitiar guztiak animatu nahi ditugu azterketa horretan parte hartzera".

Informazio gehiago

Bidali:  

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa