Erokomeri musika taldeak Izan diskoa aurkeztuko du ostiralean Azpeitiko Gaztetxean, Odolaren Mintzoa eta Rukula taldeekin batera. Zuzenekoak 21:30ean hasiko dira, eta sarrera 5 euro ordaindu beharko da.
Durangoko Azokarako kaleratu zuen Izan izeneko diskoa Erokomerik. Taldea osatzen duten gazteek Andoaingo Garate estudioan grabatu zuten beren aurreneko lana, hamar abesti dituena. Odolaren Mintzoaren kolaborazioa ere jaso dute Izan diskoan.
Maialen Bastida, Asier Aizpuru, Unai Olaizola, Eider Iturralde eta Martin Altuna azpeitirrek eta Josu Furundarena usurbildarrak eta Miren Cuerdo lasartearrak osatzen dute Erokomeri.
Durangoko Azokaren atarian elkarrizketa egin zion Urola Kostako Hitzak Martin Altuna Erokomeri taldeko kideari.