Errege Magoen pajeak Azpeitian izango dira gaur arratsaldean, umeen gutunak jasotzen. Baigera jubilatuen elkarteak antolatuta, 17:30ean iritsiko dira Meltxor, Gaspar eta Baltasarren laguntzaileak udaletxeko arkupera.
Bihar, Errege bezperan, iritsiko dira hiru Errege Magoak Azpeitira. Ohi bezala,17:00etan Lasaora ailegatuko dira, eta hango umeak agurtu ondoren, trena hartuko dute herrigunera. 17:30ean iritsiko dira Burdinbidearen Euskal Museora, trenez, eta han ere ongietorria egingo diete hiru erregeei.
Kabalkada, berriz, 19:00etan hasiko da, igerilekuan. Beste urte batez, ibilbidean zehar herriko gaztetxoak izango dituzte lagun, eta 20:00ak inguruan Plazan Elkartuko dira herritarrekin. Udaletxeko balkoira igoko dira Meltxor, Gaspar eta Baltasar, haur eta gaztetxoen eskaerak entzutera.