Urteko sasoi honetan urtero egin bezala, Eusebio Eizmendi Txapelen omenezko bertso saioa antolatu du Erniarraitz bertsozale elkarteak abenduaren 20rako, eta gaur jarriko dituzte sarrerak salgai Azpeitian. Sanagustin kulturgunean eta Orkatz tabernan egongo dira txartelak eskuragarri, 8 eurotan. Egunean bertan ere jarriko dituzte sarrerak salgai Soreasuko leihatilan, 10 eurotan.
Soreasu antzokian izango da saioa, 22:00etan hasita. Aurtengoan, Maialen Lujanbio, Amets Arzallus, Igor Elortza, Aitor Mendiluze, Sustrai Colina eta Eneritz Artetxe bertsolariak igoko dira Soreasuko oholtzara. Gai-jartzaile lanetan, berriz, Haritz Etxeberria Ministro arituko da.