Joan zen ostiralean aurkeztu zuen Joxean Agirre idazleak (Azpeitia, 1949) Goldsmithen ikaslea eleberria, Donostiko Elkar aretoan. Agirreren hamargarren nobela da Goldsmithen ikaslea, eta Elkar argitaletxearekin plazaratu du.
Honako hau da liburuaren sinopsia:
"Emazteak ez du uste eleberri bat idaztea gauza oso zaila izan behar duenik, berari bata bestearen atzetik bururatzen baitzaizkio tramak, eta idazten ez baditu, horretara jartzen ez delako omen da. Horregatik beharbada, ez du inondik ere ulertzen zertarako behar dudan New Yorken bizi den irakasle baten laguntza. 'Zergatik ez duzu nobela normal bat idazten?', kexatzen da tarteka egiten ari naizenaren berri ematen badiot. Argitaratu ondoren, noski, ez ditu irakurtzen. 'Zertarako? Hiru urtean agoantatu dut matraka hori eta buruz dakit', erantzun ohi du norbaitek galdetzen badio."