Aurten, Iraurgi Berritzek eta Urkomek abiatutako Urola Gustagarri ekimenak bat egin du Errezil Sagarraren Astearekin. Urola Gustagarriren xedea da eskualdeko ekoizleen eta jatetxeen jardunak bateratzea eta, bertako produktuei balioa emanda, aisialdi eta turismo eskaintza berri bat ematea. Horregatik batu da Urola Gustagarri errezilgo sagarra erdigunean jartzen duen egitasmora.
Joan den ostiralean aurkeztu zituzten Errezil Sagarraren Astearen bueltan prestatutako ekintzak eta proiektuak, tartean, errezilgo sagarra oinarri duen liburuxka. Elkarlanean aterako dute liburua Urkomek, Iraurgi Berritzenek, Ibarbi Errezilgo Errezil sagarraren elkarteak, Errezilgo Udalak eta Errezilgo Azokak. Urola Gustagarritik adierazi zutenez, Errezil sagarra "eskualdeko produkturik garrantzitsuenetako eta ezagunetako bat da", eta liburuxkarekin produktuari "balioa" eman nahi diote".
Urkome Urola Kostako landa eremuen garapenaren alde lan egiten duen elkartea da. Iraurgi Berritzen, berriz, eskualdeko garapen agentzia. Azpeitiko Udala bi elkarteetako kide da.