Munategiko trafiko arazoa konpontzea eskatu diote Azkoitiko eta Azpeitiko udalek aldundiari

Uztarria.eus | Hirigintza | Artikulua
2017-11-20 15:09

Basarte industrialdeko eta bi udaletako ordezkariak ostiralean bildu ziren Foru Aldundiko ordezkariekin, eta Munategin sortzen diren trafiko arazoei konponbidea jartzeko hainbat neurri proposatu zuten. Arazoari irtenbidea emateko biribilgunea egitea eskatu dute bi udalek.

Bilerako irudiak. (Azkoitiko Udala)  Ikusi haundiago | Argazki originala

Azpeitiko eta Azkoitiko udaletako eta Basarte industrialdeko ordezkariek Gipuzkoako Foru Aldundiko kideekin bilera egin zuten joan zen ostiralean. Bi udaletako ordezkariek Munategin sortzen diren trafiko arazoei konponbidea ematea eskatu zieten aldundiko kideei. Aitor Bereziartua Azpeitiko Udaleko zinegotziak azaldu duenez, eskaera hori "historikoa" da; izan ere, haren arabera, Azpeitiko Udalak gair horren inguruko eskaera ugari egin dio aldundiari. "Inguruko bizilagunei sortzen zaizkien arazoez gain, industrialdeko enpresek ere eskaera ugari egin izan dituzte". Bereziartuak dio "trafiko arazo ugari" sortzen dela gune horretan, eta haren aburuz, arazoari irtenbidea emateko erabaki logikoena "biribilgunea egitea" litzateke. "Trafiko handiko gunea da, Azpeitia eta Azkoitia lotzen dituen errepide nagusia, eta bada garaia Foru Aldundiak ere behin betiko soluzio bilatzeko bi herrien arteko trafikoaren arazoari".

Azkoitiko zinegotzi Miguel Angel Bastidak adierazi du Munategiko bidegurutzea "puntu beltza" dela, eta hark ordu jakinetan "ilarak saihestea eta segurtasuna bermatzea" eskatu du. Bastidaren esanetan, Basarte industrialdean 350 langilek egiten dute lan, eta, gainera, gasolindegi bat ere badela han gogorarazi du. "Horrek esan nahi du egunean 600 bat ibilgailu mugitzen direla, eta lantegietako sarrera-irteera orduetan kotxe ilara handiak sortzen dira".

Bidali:  

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa