Zortzi eragilek bat egin dute Kataluniari babesa erakusteko eta Euskal Herriaren autodeterminazio-eskubidea aldarrikatzeko

Uztarria.eus | Politika | Artikulua
2017-09-26 12:17

Gure Esku Dagok, LABek, ELAk, EH Bilduk, EHNEk, Elkar-ekinek, Ernaik eta Napar Zuzterrak taldeak elkarretaratzea deitu dute ostegunerako. Besteak beste, aldarrikatzen dutena da Kataluniak bere etorkizun politikoa autodeterminazioaren bidez erabakitzeko eskubidea duela, eta gatazka politikoak konpontzeko "biderik eraginkorrena" prozedura demokratikoen erabileran datzala. Horrez gain, azpimarratu dute, "Kataluniak bere etorkizun politikoa hautatzeko duen autodeterminazio-eskubidea" Euskal Herriarentzat ere aldarrikatzen dutela.

Gure Esku Dagoko, LABeko, ELAko, EH Bilduko, EHNEko, Elkar-ekineko, Ernaiko eta Napar Zuzterrak taldeako kideak. (Azpeitiko GED)  Ikusi haundiago | Argazki originala

Azpeitiko Gure Esku Dagok elkarlanerako deia egin die herriko alderdi politikoei, sindikatuei eta gizarte eragileei "Kataluniako herria bizitzen ari den une historiko honetan". Guztira, herriko zortzi eragilek egin dute bat Kataluniari babesa erakusteko eta Euskal Herriaren erabakitze eskubidea aldarritzeko: Gure Esku Dagok, LABek, ELAk, EH Bilduk, EHNEk, Elkar-ekinek, Ernaik eta Napar Zuzterrak taldeak. 

Zortzi eragileek sinatu duten testuan adierazi dute, Kataluniako herriak bere etorkizun politikoa autodeterminazioaren bidez erabakitzeko eskubidea duela, eta katalanei soilik dagokiela erabakitzea zer nolako harreman politikoa mantendu nahi duten estatu espainiarrarekin. "Gatazka politikoak konpontzeko biderik eraginkorrena prozedura demokratikoen erabileran datza. Beraz, Kataluniako eskaera politikoak erreferendum demokratiko eta lotesle baten bidez bideratu behar dira, katalanek -mugarik gabe- berezko Estatu independentea ala estatu espainiarrean jarraitzea nahi duten erabaki dezaten", adierazi dute bat egin duten eragileek.

Era berean, Gobernu espainiarraren "mehatxuak arbuiatzen" dituztela eta Kataluniaren autogobernuaren aurkako "eraso oro tinko errefusatzen" dutela azpimarratu dute: "Demokrazian sakontzeko eskaerari ezin zaio
erantzun eskubide demokratikoak murriztuz".

Kataluniak bere etorkizun politikoa hautatzeko duen autodeterminazio-eskubidea Euskal Herriarentzat ere aldarrikatu dute, eta keinu egin diote iazko ekainean Hitzartuk Azpeitian egin zuten herri galdeketari: "Ezin dugu ahaztu, Azpeitian, adibidez, 2016ko ekainaren 5ean herritarren %39,37k bozkatu zuela; 4.781 lagunek hain zuzen ere, eta horietako 4.524ek baietz esan ziotela euskal estatu independenteari".

"Kataluniar herria bizitzen ari den salbuespen egoera kontutan izanda", herritarrei dei egin diete datorren ostegunean, hilaren 28an, egingo duten elkarretaratzean har har dezaten. Plazan jarri dute hitzordua, 19:00etan. Horrez gain, herritarrak animatu nahi dituzte urriaren 1ari begira estelada nahiz ikurrina etxeko balkoietan jartzera.

Bidali:  

Erantzunak

Erabiltzailearen aurpegia jesuita | 2017-09-26 : 13:10

8 eragile daude deitzaileen artean baina batzuek falta direla iruditzen zait. Ez dakit ez al duten bat egin edo oraindik atxikitu gabe dauden; EAJ, Gaztetxea...

Erabiltzailearen aurpegia IrekiAteak | 2017-09-27 : 13:47

PNV ez dago, hauek beste bidelagun batzuk dituztelako nahiago. Katalu├▒iara milaka polizia bidaltzen dituztenak eta korrupzioagatik ehunka inputatu dituzten horiekin eta kare biziz Lasa ta Zabala lurperatu zituztenekin sentitzen dira beren saltsan. Horiekin batera argazkia ateratzeko arazorik ez dute izaten. Badakizue, Espainian eroso sentitzea da PNVren funtzioa azken hamarkadetan. Sabino Aranak eta Agirre lehendakariak burua altxatuko balute a ze lotsa sentituko luketena.

Erabiltzailearen aurpegia JON | 2017-09-28 : 10:41

Beste batzuek beste bidelagun batzuk zituzten,ehundaka gizon,emakume eta ume erahildako euskal borreroak.
Dagoenekoz ahaztuta?

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa